Aqrar-sənaye kompleksi

Ana səhifə

Gəncədə üzümçülük və şərabçılığın inkişafına həsr olunmuş konfrans keçirilib

08 oktyabr 2012 15:47 (UTC +04:00)

Bakı - APA-Economics. Oktyabrın 7-də Gəncədə İqtisadi İnkişaf Nazirliyinin və Gəncə Şəhər İcra Hakimiyyətinin birgə təşkilatçılığı ilə “Üzümçülük və şərabçılığın inkişafı perspektivləri: qabaqcıl təcrübə və texnologiyalardan istifadə imkanları” mövzusunda beynəlxalq elmi-praktik Konfrans keçirilib.

«APA-Economics»in məlumatına görə, konfransda iqtisadi inkişaf nazirinin müavini Niyazi Səfərov Azərbaycan iqtisadiyyatında dinamik inkişafı təmin edən amillər, davamlı inkişaf mərhələsində qarşıda duran vəzifələr, eləcə də ayrı-ayrı iqtisadi sahələrdə modernləşmənin müasir vəziyyəti və gələcək perspektivlər barədə məlumat verib.

Bildirilib ki, ölkədəki davamlı iqtisadi inkişaf ölkənin əsas makroiqtisadi göstəricilərində, xarici ticarət və investisiyalara, eləcə də regionların inkişafına dair statistik rəqəmlərdə özünü daha aydın göstərir. Qeyd edilib ki, 2004-2011-ci illərdə ÜDM 3 dəfə, sənaye istehsalı 2,7 dəfə, dövlət büdcəsinin gəlirləri 13 dəfə artıb, yoxsulluq səviyyəsi 5,9 dəfə azalıb. Hazırda ölkənin valyuta ehtiyatları xarici dövlət borcunu təqribən 10 dəfə üstələyir. Ölkənin sosial-iqtisadi inkişafında özəl sektorun rolunun artdığını vurğulayan nazir müavini Niyazi Səfərov ÜDM istehsalının 80%-dən çoxunun özəl sektorun payına düşdüyünü vurğulayıb.

Diqqətə çatdırılıb ki, ölkəmizdə dünya standartlarına uyğun, yüksək keyfiyyətli şərabçılıq məhsulları istehsal edən müəssisələr mövcuddur və onların sayı davamlı olaraq artır. Oktyabrın 6-da Gəncədə keçirilən “I Beynəlxalq Şərab Festivalı”nda nümayiş olunan yüksək keyfiyyətli şərabçılıq məhsulları buna əyani sübutdur. Qeyd edilib ki, şərabçılığın inkişaf etdirilməsi, istehsal olunan məhsulların ənənəvi və yeni bazarlara ixrac imkanlarının genişləndirilməsi, rəqabətqabiliyətliliyinin artırılması, məhsulların beynəlxalq standartların tələblərinə uyğunlaşdırılması istiqamətində tədbirlər davam etdirilir və bu sahədə sahibkarlara hər cür dəstək göstərilir.

Fransanın Azərbaycandakı səfiri Paskal Menuier Azərbaycanın böyük iqtisadi potensiala malik olduğunu və mövcud imkanlardan səmərəli istifadənin, eləcə də iş adamları arasında əməkdaşlığın genişləndirilməsinin Fransa və Azərbaycan arasında iqtisadi-ticarət əlaqələrinin inkişafında əhəmiyyətli olacağını qeyd edib.

Konfrans çərçivəsində yerli və xarici iş adamlarının iştirakı ilə İşgüzar Görüş keçirilib, əlaqələrin genişləndirilməsi imkanları müzakirə edilib.