Aqrar-sənaye kompleksi

Ana səhifə

Bakıda arıçılıq məhsullarının növbəti respublika sərgi-satış yarmarkası keçirilir

17 oktyabr 2012 13:09 (UTC +04:00)

Bakı – APA-Economics. Bu gün Bakıda arıçılıq məhsullarının növbəti respublika sərgi-satış yarmarkası açılıb.

“APA-Economics”in xəbərinə görə, açılış mərasimində çıxış edən kənd təsərrüfatı nazirinin müavini Aslan Aslanov aqrar sahənin, o cümlədən arıçılığın inkişafından, görülən işlərdən danışmış, yarmarkanın əhəmiyyətindən bəhs edib.

Aslan Aslanov bildirib ki, “Arıçılıq haqqında” qanuna əsasən bu tədbirin hər il keçirilməsi artıq bir ənənəyə çevrilib. Sərgi-satış yarmarkası xüsusilə Bakı sakinlərində böyük maraq doğurur. Yarmarkanın məqsədi ölkəmizdə arıçılığı təbliğ etmək, onu geniş yaymaq, inkişaf etdirmək, arıçılıq sahəsində təcrübə mübadiləsi aparmaq və arıçılıq məhsullarının ixracı üçün yollar axtarmaqdır.

Nazir müavini diqqətə çatdırıb ki, yarmarkaya 51 şəhər və rayondan 200 nəfər arıçı gəlib. Satışa 107 ton bal, 40 kiloqram çiçək tozu, 1,5 kiloqram arı südü, 10 kiloqram vərəmum çıxarılıb. Yarmarka başlamamışdan əvvəl satışa çıxarılan arıçılıq məhsullarının keyfiyyəti respublika baytarlıq laboratoriyasında yoxlanılır. 1 kq yüksək keyfiyyətli bal 15 manata satılır.

A.Aslanov qeyd edib ki, bu ilin yanvarın 1-nə Azərbaycanda 212 651 arı ailəsi var. Hər arı ailəsindən keçən illərdə orta hesabla 10-11 kiloqram bal alınırdı. Cari ildə 1100 ton bal istehsalı gözlənilir. Ölkəmizdə arıçılıqla 6 min nəfərdən çox adam məşğul olur. Hesablamalar göstərir ki, ölkədə arı ailəsinin sayını 5 dəfə, onun məhsuldarlığını 2 dəfə artırmaq mümkündür. 2004-cü ilə nisbətən 2011-ci ildə Azərbaycanda arı ailələrinin sayı 2,2 dəfə artmışdır. Azərbaycanda bal istehsalı daxili tələbatı tam ödəyir.

Nazir müavini bildirib ki, gələn il daha böyük, 400-500 nəfər tutan yerdə sərgi-satış yarmarkasının keçirilməsi planlaşdırılır.

Digər çıxış edənlər də ölkədə arıçılığın inkişafından danışıblar. Sonra satış-sərgisi ilə tanışlıq başlayıb.

Yarmarka noyabrın 5-dək davam edəcək.