Aqrar-sənaye kompleksi

Ana səhifə

Azərbaycanla İsrail arasında aqrar sahədə əməkdaşlıq müzakirə edilib

23 oktyabr 2012 16:18 (UTC +04:00)

Bakı - APA-Economics. Azərbaycanla İsrail arasında kənd təsərrüfatı sahəsində əməkdaşlığın perspektivləri bu gün kənd təsərrüfatı naziri İsmət Abasovla İsrailin Azərbaycandakı səfiri Rafael Harpazın görüşündə müzakirə edilib.

Nazirlikdən «APA-Economics»ə verilən məlumata görə, ölkədə aqrar sektorun inkişafı və bu sahədə əldə edilən uğurlar barədə məlumat verən İsmət Abasov bildirib ki, iki ölkə arasında aqrar sahədə əməkdaşlıq yüksək səviyyədə inkişaf edir.

Qeyd edək ki, bu ilin ilk yarısında İsraildən Azərbaycana kənd təsərrüfatı və ərzaq məhsulları, o cümlədən əsasən emal olunmuş meyvə-tərəvəz, qoz-fındıq məhsulları, diri heyvanlar, yağlı toxum və meyvələr, heyvanlar üçün hazır yemlər, taxıldan, undan, nişastadan və ya süddən alınan hazır məhsullar idxal olunmuş, Azərbaycandan İsrailə isə kənd təsərrüfatı və ərzaq məhsulları, o cümlədən emal olunmuş meyvə-tərəvəz və qoz-fındıq məhsulları, taxıldan, undan, nişastadan və ya süddən alınan hazır məhsullar və digər ərzaq məhsulları ixrac olunub.

Nazir Azərbaycanla İsrail arasında kənd təsərrüfatı sahəsində əməkdaşlığın inkişafı ilə bağlı müxtəlif təkliflər səsləndirib. Bura iki ölkə arasında iki ölkə arasında kənd təsərrüfatı sahəsində əməkdaşlığa dair sazişin imzalanması, Elmi-Tədqiqat Tərəvəzçilik İnstitutunun təcrübə bazasında pilot istixananın yaradılması, orqanik kənd təsərrüfatı məhsul istehsalı və bu sahədə fermerlərə səmərəli məsləhət xidmətinin göstərilməsi sahəsində təcrübə mübadiləsi; damcı üsulu ilə suvarmanın tətbiqi sahəsində əməkdaşlıq; müasir aqrotexniki və suvarma texnologiyalarının tətbiqi üzrə birgə layihələrin həyata keçirilməsi və s. aiddir.

İsrail səfiri Rafael Harpaz fəaliyyəti dövründə iki ölkə arasında aqrar sahədə əməkdaşlıq əlaqələrinin daha da genişləndirilməsi üçün səylərini əsirgəməyəcəyini söyləyib.