Azərbaycanda 2 turagent və 4 otel şəffaf vergi partnyoru statusuna malik olmaq üçün Vergilər Nazirliyinə müraciət edib.
“APA-Economics”in məlumatına görə, bu barədə turagentlər və otel fəaliyyəti ilə məşğul olan vergi ödəyiciləri üçün Vergilər Nazirliyi ilə Azərbaycan Turizm Assosiasiyasının birgə təşkil edilən görüşdə Nazirliyin Lokal Gəlirlər Departamentinin baş direktoru Nəsimi Cəfərov məlumat verib. Onun sözlərinə görə, hazırda bu müraciətlər üzrə turagent və otellərin göstəriciləri təhlil olunur.
N.Cəfərov bildirib ki, hazırda vergi ödəyiciləri arasında 1 turagent və 3 otel şəffaf vergi partnoru statusuna malikdir.
Qeyd edək ki, 50-dək vergi ödəyicisinin iştirak etdiyi görüşdə vergi sistemində aparılan islahatlar, vergi orqanları ilə vergi ödəyiciləri arasında partnyorluq münasibətlərin genişləndirilməsi istiqamətində aparılan işlər barədə məlumat verilib. Qeyd edilib ki, vergi daxilolmalarının icrası prosesində vergi orqanları daha çox nəzarət tədbirlərinə deyil, vergi ödəyiciləri ilə partnyorluq münasibətləri çərçivəsində vergilərin könüllü ödənilməsinin inkişafına nail olmağa çalışırlar: “2017-ci ildən şəffaf vergi partnyorluğu əsasında fəaliyyət göstərən vergi ödəyicilərinə “Yaşıl dəhliz” prinsipi ilə xidmətlər göstərilir. Partnyor ödəyicilərə ənənəvi xidmətlərlə yanaşı, İKT-nin son nailiyyətlərinə əsaslanan innovativ xidmətlər də təqdim edilir. Belə xidmətlərə videobağlantılar, Çağrı və xidmət mərkəzlərində partnyor ödəyicilərə növbəsiz və sürətli xidmətlərin göstərilməsi, partnyor ödəyicilərin müraciəti əsasında onlar üçün dəyirmi masa, seminar və konfransların təşkili, xüsusi təlim proqramlarının hazırlanması və s. aiddir”.
Vergi Məcəlləsinə edilmiş əlavə və dəyişikliklər, eləcə də “Nağdsız hesablaşmalar haqqında” qanuna edilmiş dəyişiklikləri görüş iştirakçılarının nəzərinə çatdıran departament direktoru turagentlərə ödəmələrin yalnız nağdsız qaydada həyata keçirilməli olduğunu vurğulayıb, turagentlərin və otellərin fəaliyyət sahələrinə aidiyyatı olan digər qanunvericilik aktlarında edilmiş dəyişikliklər də görüş iştirakçılarının diqqətinə çatdırıb.
Aprelin 10-dan başlayaraq 1 ay müddətində Bakı şəhərində ticarət festivalının keçirildiyi və bu festival zamanı xarici vətəndaşlarla yanaşı yerli əhali tərəfindən də müəyyən olunmuş ticarət obyektlərindən alınmış mallara görə ƏDV-ni geri ala biləcəyi barədə də görüş iştirakçılarına məlumat verilib. Nəticə etibarilə bu festivalların otel, turagent, iaşə və digər sahələrin inkişafına da müsbət təsir göstərəcəyi qeyd olunub.
Ölkəmizdə turizm sektorunun inkişafına müsbət təsir göstərən amillərdən biri də 2016-cı ildən etibarən respublikamızda tətbiq edilən “Tax free” sistemidir. Qeyd edilib ki, “Tax free” sisteminin tətbiqi xarici turistlərin ölkəyə cəlb edilməsinə və onların ölkə ərazisində daha çox mal almaqla, pərakəndə ticarətdə satış dövriyyəsinin artırılmasına, ixracyönümlü istehsalın stimullaşdırılmasına, xarici valyutanın ölkəyə axınının artmasına şərait yaradır. “Tax free” sistemində ƏDV-nin qaytarılması üçün əsasən hava limanlarında xüsusi məntəqələr yaradılıb. Bu sistem ölkəmizə gələn turistlər arasında böyük marağa səbəb olub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
