Avropa

Ana səhifə

Avropa

Bu gün NATO-nun zirvə toplantısı başlayır

03 aprel 2009 10:29 (UTC +04:00)

Strasburq. Fuad Qulubəyli-APA. Bu gün Fransanın Strasburq şəhərində NATO-nun zirvə toplantısı öz işinə başlayacaq. APA-nın Avropa bürosunun məlumatına görə,
hazırda toplantıya dəvət olunmuş alyansa üzv ölkələrin dövlət və hökumət başçıları Strasburq və Almaniyanın Baden-Baden şəhərinə gəlməkdədir. Sammitin əsas siması sayılan ABŞ prezidenti Barak Obamanın bu dəqiqələrdə Strasburq hava limanına gələcəyi gözlənilir. Daha sonra o, Fransa prezidenti ilə təkbətək görüş keçirəcək və prezidentlər Strasburqun “Chateau des Rohan” restoranında birgə nahar edəcəklər. Günün ikinci yarısında NATO sammiti çərçivəsində ABŞ prezidenti Strasburqda və Almaniyanın yaxın şəhərlərində təhsil alan 4 minə yaxın yerli və xarici tələbə qarşısında çıxış edəcək.

NATO sammitinin rəsmi açılış mərasimi isə bu gün yerli vaxtla 18.00-da (Bakı vaxtı ilə 21.00-də) Almaniyanın Baden-Baden şəhərində keçiriləcək. Sammitin açılış mərasimindən sonra toplantı iştirakçıları məşhur alman violonçel ustası Anne Sofi Mutterin konsert proqramını izləyəcəklər. Daha sonra Almaniyanın kansleri Angela Merkel qonaqlar üçün ziyafət verəcək.

Qeyd edək ki, NATO-nun 60 illiyi çərçivəsində təşkil olunacaq bu sammitdə quruma üzv ölkələrin hökumət və dövlət başçıları əsasən təşkilatın üzləşdiyi ümumi və strateji məsələləri müzakirə edəcək, yeni strateji konsepsiya hazırlamaq məqsədilə Avroatlantika təhlükəsizliyi kontekstində NATO-nun yerini müəyyənləşdirmək üçün gələcək perspektivləri araşdıracaqlar. Sammitdə NATO-nun Əfqanıstan strategiyasında irəliləyişlər, Kosovodakı vəziyyət, İSAF və KFOR-la bağlı ABŞ-ın yeni hökumətinin yeni strategiyası, qurumun müdafiə sistemi və silahlara nəzarət mexanizmlərinin transformasiyası, Rusiya ilə münasibətlər, Fransanın quruma yenidən tamhüquqlu üzv qəbul olmaq istəyi, bunun NATO-Avropa İttifaqı münasibətlərinə təsiri müzakirə olunacaq.

Strasburqda start götürəcək toplantının işində əsasən alyansa üzv olan ölkələrin dövlət və hökumət başçıları, xarici işlər nazirləri, müdafiə nazirləri, üzv ölkələrin NATO yanında daimi nümayəndələri, NATO-nun baş katibi, hərbi komitənin rəhbəri, Avropada müttəfiq qüvvələrin Ali Baş Komandanı və transformasiya üzrə birgə hərbi qüvvələrin Ali Baş Komandanı iştirak edəcəklər.