Hadisə

Ana səhifə

Hadisə

Tanınmış idmançını qətlə yetirən şəxs barəsində həbs qətimkan tədbiri seçilib

17 mart 2022 15:39 (UTC +04:00)

Kikboks üzrə tanınmış idmançı Zaur Yusifovu güllələyərək öldürməkdə təqsirləndirilən 2000-ci il təvəllüdlü Samir Şirəliyevin barəsində həbs qətimkan tədbirinin seçilməsi ilə bağlı istintaq orqanının təqdimatına baxılıb.

APA xəbər verir ki, Binəqədi rayon Məhkəməsində keçirilən prosesdə qərar elan olunub. Qərara əsasən Samir Şirəliyev barəsində 4 aylıq həbs qətimkan tədbiri seçilib.

Baş Prokurorluğun Mətbuat xidmətindən APA-ya bildirilib ki, martın 14-də saat 21 radələrində Binəqədi rayonu ərazisində yerləşən marketlərdən birində 1984-cü il təvəllüdlü Zaur Yusifovun öldürülməsi barədə rayon prokurorluğuna məlumat daxil olub. Faktla bağlı Baş Prokurorluğun İstintaq idarəsi tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. İlkin istintaqla 2000-ci il təvəllüdlü Samir Şirəliyevin qətlə yetirilmiş xalası oğlu “Emin 444” ləqəbli Emin Səfərovun öldürülməsində şübhələndiyi Zaur Yusifovu qisas almaq məqsədilə odlu silahdan atəş açaraq qəsdən öldürməsinə əsaslı şübhələr müəyyən edilib. Samir Şirəliyev təqsirləndirilən şəxs qismində cəlb edilməklə barəsində məhkəmənin qərarı ilə həbs qətimkan tədbiri seçilib. Hazırda cinayət işi üzrə zəruri istintaq tədbirləri davam etdirilir.

Qeyd edək ki, hadisə martın 14-də Nəsimi rayonu 6-cı mikrorayon ərazisində qeydə alınıb. Kikboks üzrə tanınmış idmançı Zaur Yusifov evinin yaxınlığında yerləşən marketinin içində "Vinçester” markalı silahla güllələnərək qətlə yetirilib.

Hüquq-mühafizə orqanlarının əməkdaşlarının keçirdikləri əməliyyat-axtarış tədbirləri nəticəsində qətli törətməkdə şübhəli bilinən 2000-ci il təvəllüdlü Samir Şirəliyev saxlanılaraq istintaqa təhvil verilib. Samir Şirəliyev şəxsin kriminal aləmdə "Emin 444" ləqəbli Emin Səfərovun xalası oğlu olduğu bildirilir. Onu da qeyd edək ki, Zaur Yusifov məhz 2019-cu ildə tanışı Həsən Tağıyevlə birgə “Emin 444" ləqəbi ilə tanınan kriminal avtoritet Emin Səfərovun qətlində təqsirləndirilib.

Cinayət işi Bakı Ağır Cinayətlər Məhkəməsində araşdırılıb.

Hakim Faiq Qəniyevin sədrliyi ilə keçirilən prosesdə ötən ilin oktyabrında elan olunmuş hökmə əsasən, hadisədə iştirakı sübut olunmadığı üçün Zaur Yusifova bəraət verilib, Həsən Tağıyev isə 18 il müddətə azadlıqdan məhrum edilib.