Bakı. Hafiz Heydərov - APA. Fövqəladə Hallar Nazirliyi (FHN) ötən il respublikanın şimal-qərb bölgəsində baş verən zəlzələnin fəsadlarının aradan qaldırılmasına dair növbəti statistikasını açıqlayıb.
FHN-dən APA-ya verilən məlumata görə, 1 avqust 2013-cü il tarixinə qədər zəlzələ bölgəsində 59156 ev və sosial obyektə baxış keçirilib, 6065 ev və sosial obyektə qəzalı, 11 236 ev və sosial obyektə bərpa, 24101 ev və sosial obyektə təmir, 17754 ev və sosial obyektə isə qənaətbəxş rəyi verilib.
Avqustun 1-ə qədər Azərbaycanın zəlzələ baş vermiş şimal-qərb bölgəsindəki üç rayonda ümumi sahəsi 543531 kv.m olan 4277 fərdi yaşayış evinin tikintisi başa çatdırılıb. Tikintisi başa çatdırılan evlərin 3388-i Zaqatalada, 430-u Qax, 459-u isə Balakən rayonundadır. Hazırda 815 evin tikintisi davam etdirilir.
Sosial obyektlərdən 38 məktəbin, o cümlədən, Zaqatalada 22, Qaxda 11, Şəkidə 3, Balakəndə 2 məktəbin tikintisinə başlanılıb. Avqustun 1-dək 8080 şagird yerlik 30 məktəb binası, 55 yerlik 1 uşaq bağçası tikilib istifadəyə verilib. Zaqatala rayonunun Muxax kəndində 480 şagird yerlik məktəb binası bərpa və gücləndirilib.
Hesabatda həmçinin qeyd edilir ki, avqustun 1-dək zəlzələdən ziyan çəkmiş əhaliyə bərpa işlərinin aparılması ilə əlaqədar olaraq 17734,0 min manat yardım ödənilib.
Qeyd edək ki, 7 may 2012-ci ildə episentri Zaqatala rayonu ərazisinə düşən zəlzələ nəticəsində Zaqatala, Balakən və Qax rayonlarında yaşayış evlərinə, sosial və infrastruktur obyektlərə ciddi ziyan dəyib.
Hadisədən dərhal sonra zəlzələnin nəticələrinin aradan qaldırılması ilə bağlı FHN tərəfindən operativ qərargah yaradılıb, nazirliyin mütəxəssisləri dəymiş ziyanın müəyyənləşdirilməsi ilə əlaqədar müvafiq tədbirlər həyata keçirməyə başlayıblar.
Azərbaycan Prezidentinin göstərişlərinə əsasən Nazirlər Kabinetinin 08 may 2012-ci il tarixli 117 saylı sərəncamı ilə 07 may 2012-ci ildə respublikanın şimal-qərb bölgəsində baş vermiş zəlzələnin nəticələrinin aradan qaldırılması üçün ilkin olaraq ehtiyat fondundan 20 milyon manat, 2012-ci il Dövlət büdcəsində dürüstləşmə ilə əlaqədar təbii fəlakətlərin nəticələrinin aradan qaldırılması üçün 300,0 mln manat və Nazirlər Kabinetinin 24 oktyabr 2012-ci il 288 saylı sərəncamı ilə 100 mln manat və 2013-cü ilin Dövlət Büdcəsindən 189,0 mln manat olmaqla, cəmi 609 mln. manat vəsait ayrılıb.
Dövlət başçısının tapşırıqlarına uyğun olaraq bu istiqamətdə zəlzələ zonasında təbii fəlakətin nəticələri aradan qaldırılır və ziyan dəymiş əhaliyə hər cür köməkliklərin göstərilməsi davam etdirilir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
