Daxili siyasət

Ana səhifə

Daxili siyasət

Ramil Usubov ATƏT-in seçkiləri müşahidə missiyasının rəhbərini qəbul edib

10 sentyabr 2008 16:35 (UTC +04:00)

Bakı-APA. Azərbaycanın daxili işlər naziri, general-polkovnik Ramil Usubov sentyabrın 10-da ATƏT-in seçkiləri müşahidə missiyasının başçısı Boris Frles və həmin missiyanın təhlükəsizlik üzrə mütəxəssisi Emil Payriçi qəbul edib. Daxili İşlər Nazirliyinin mətbuat xidmətindən APA-ya verilən məlumata görə, nazir Ramil Usubov qeyd edib ki, ölkə prezidentinin rəhbərliyi altında Azərbaycanda dövlət müstəqilliyinin, demokratik prinsiplərin möhkəmlənməsi, güclü dövlət quruculuğu işləri, ictimai münasibətləri tənzimləyən hüquqi mexanizmlərin təkmilləşdirilməsi prosesi uğurla davam edir. Həyata keçirilən geniş miqyaslı sosial, iqtisadi və demokratik-hüquqi islahatlar çərçivəsində Daxili İşlər Nazirliyinin fəaliyyətinin beynəlxalq norma və standartlara uyğun qurulması üzrə də əhəmiyyətli işlər görülüb, insan hüquq və azadlıqlarının əsas götürüldüyü demokratik prinsiplərə söykənən yeni qanunlar qəbul edilib.

Daha sonra qonaqlara 2008-ci ilin oktyabrında Azərbaycanda keçiriləcək prezident seçkilərinə hazırlıqla bağlı polisin üzərinə düşən vəzifələr və görülən işlər barədə ətraflı məlumat verilib.

Qonaqlara bildirilib ki, sentyabrın 8-də DİN-in Polis Akademiyasında Azərbaycanda İnsan Hüquqlarına dair Beynəlxalq Standartların Təsbiti üzrə birgə işçi qrupunun təşəbbüsü ilə hazırlanan “Seçkilər və polis” mövzusunda beynəlxalq ekspertlər Riçard Tall və Ari Bloyd tərəfindən Bakı Şəhər Baş Polis İdarəsinin, Sumqayıt və Abşeron şəhər-rayon polis orqanlarının xidmət üzrə rəis müavinlərinin, ictimai təhlükəsizlik xidməti rəislərinin iştirakı ilə treninq keçirilib. Analoji treninq bu gün Lənkəran şəhərində keçirilir. Gəncə, Göyçay şəhər-rayon polis orqanlarının şəxsi heyəti ilə və DİN Daxili Qoşunlarının hərbi hissələrində də bu kimi treninqlərin keçirilməsi nəzərdə tutulur. Daha sonra qonaqlara seçkilərlə bağlı vətəndaşların şəxsiyyət vəsiqələri ilə təmin edilməsi üzrə görülən tədbirlər barədə məlumat verilib.

Daxili işlər naziri Ramil Usubov əlavə edib ki, “Sərbəst Toplaşma Azadlığı Haqqında” qanuna müvafiq olaraq, artıq Bakı Şəhər İcra Hakimiyyəti paytaxtın bütün rayonlarında toplantıların keçirilməsi üçün 11 yer müəyyənləşdirib. Belə yerlər, qanuna uyğun olaraq, respublikanın bütün şəhər və rayonlarında da ayrılıb.

ATƏT-in Seçkiləri müşahidə missiyasının başçısı cənab Boris Frles ətraflı məlumata görə təşəkkürünü bildirib, son illər Azərbaycanda gedən dinamik inkişafdan məmnunluğunu ifadə edib, rəhbərlik etdiyi missiyanın işinin nədən ibarət olacağı, hansı işləri görəcəyi barədə ətraflı məlumat verib.