Daxili siyasət

Ana səhifə

Daxili siyasət

Azərbaycanda müxalifət partiyalarının yeni ittifaqının yaradılması məqsədilə danışıqlar başlayıb

16 sentyabr 2008 11:00 (UTC +04:00)

Bakı. Elnur Məmmədli - APA. Müxalifət partiyalarının prezident seçkilərindən sonrakı mərhələdən 2010-cu ilə kimi fəaliyyətini əlaqələndirən yeni ittifaqının yaradılması məqsədi ilə bağlı müzakirələr başlayıb. Bu barədə APA-ya Azərbaycan Demokrat Partiyasının (ADP) sədri Sərdar Cəlaloğlu məlumat verib. Onun sözlərinə görə, artıq bununla bağlı Müsavat Partiyasının başqanı İsa Qəmbər və “Azərbaycan Naminə” İctimai Forumun prezidenti Eldar Namazovla müzakirələr aparılıb.

O, yaxın günlərdə bu ittifaqın yaradılması ilə bağlı müzakirələrin intensivləşəcəyini və əhatə dairəsinin genişlənəcəyini qeyd edib: “Müxalifət bu vaxta qədər bir-birindən fərqli müstəvilərdə fəaliyyət göstərib və bu, heç bir nəticə verməyib. İndi aparıcı müxalifət partiyalarının hamısının bir ittifaqda birləşməsi təklif edilir. Prezident seçkiləri ilə bağlı 5 təşkilatın yaratdığı əməkdaşlıq mərkəzi ittifaq, siyasi qurum, siyasi təşkilat deyil. Biz blok, siyasi blok və ya seçki bloku yaratmağı düşünürük”. S. Cəlaloğlu bildirib ki, hər hansı ayrı-seçkilik olmadan ciddi təsir qüvvəsi olan müxalifət partiyalarının bu ittifaqa daxil edilməsi nəzərdə tutulub.

ADP-nin müxalifətin əməkdaşlıq mərkəzinin prezident seçkiləri ilə bağlı imzaladığı bəyanata qoşulub qoşulmayacağına gəldikdə, S. Cəlaloğlu bildirib ki, belə bir fikirləri yoxdur: “Biz prezident seçkilərinin nəticələrini əvvəlcədən elan etməyin əleyhinəyik. Digər tərəfdən, bundan əvvəllər də müxtəlif partiyaları arasında fikir ayrılıqlarının olmasına baxmayaraq, partiyalar arasında əməkdaşlıq dayanmayıb. İndi də düşmənçilik üçün səbəb yoxdur. Biz bu mövqeyi düzgün saymırıqsa, niyə orada olmalıyıq? Sadəcə, başqa bir müstəvidə əməkdaşlıq etməyi əhəmiyyətli sayırıq”.

müxalifət_ittifaq