Daxili siyasət

Ana səhifə

Daxili siyasət

Azərbaycan prezidenti Saatlı və Sabirabad rayonlarına səfər edib - YENİLƏNİB

Azərbaycan prezidenti Saatlı və Sabirabad rayonlarına səfər edib - <font color=red>YENİLƏNİB</font>

26 sentyabr 2008 14:28 (UTC +04:00)

APA-nın “AzərTAC” Dövlət İnformasiya Agentliyinə istinadən yaydığı məlumata görə, dövlət başçısı ilk öncə Saatlıda şəhərin mərkəzində yerləşən Heydər Əliyev adına mədəniyyət və istirahət parkında ulu öndərin abidəsini ziyarət edib. Qeyd edək ki, sahəsi 5,6 hektar olan parkda yaraşıqlı fəvvarə inşa edilib. Parkın ərazisində milli memarlıq üslubunda tikilmiş Heydər Əliyev Muzeyi, Yeni Azərbaycan Partiyası rayon təşkilatının binası, rəsm qalereyası yerləşir. 15 metr hündürlükdə ölkəmizin dövlət bayrağı dalğalanır, genişekranlı monitor qoyulmuş, uşaq əyləncə və istirahət mərkəzi yaradılıb. Daha sonra dövlət başçısı Saatlıda Heydər Əliyev Muzeyinin açılışında iştirak edib. Milli memarlıq üslubunda tikilmiş, sahəsi 223 kvadratmetr olan muzeyin ekspozisiya salonunun 8 bölməsində öndərin həyat və fəaliyyətinin bütün dövrlərini əks etdirən fotoşəkillər, kitablar, müxtəlif sənədlər toplanıb. Daha sonra prezident İlham Əliyev muzeyin qarşısında rayon ictimaiyyətinin nümayəndələri ilə görüşüb. Dövlət başçısı həmçinin Saatlı rayonunda istifadəyə verilmiş akademik Zərifə Əliyeva adına mədəniyyət və istirahət parkı ilə tanış olub. 2,3 hektar sahəsi olan yeni istirahət guşəsi şəhid ailələri, müharibə əlilləri üçün tikilmiş 32 mənzilli binanın və yaşayış massivinin yaxınlığında yerləşir. Dövlət başçısı parkda akademik Zərifə xanım Əliyevanın abidəsini ziyarət edib. Prezident burada görülmüş işləri yüksək qiymətləndirib və sakinlərin istirahəti üçün gözəl şərait yaradıldığını bildirib.
Daha sonra prezident İlham Əliyev Sabirabad rayonuna səfər edib. Dövlət başçısı ilk olaraq “Qafqaz AKP” Məhdud Məsuliyyətli Cəmiyyətin “Alkapon” müəssisəsində olub. Rayonun Qalaqayın kəndində sahibkar tərəfindən tikilmiş, avadanlığı Çindən gətirilmiş zavodda müxtəlif növ alüminium kompozit paneli istehsal edilir. Tikintisinə 4,6 milyon manat vəsait sərf olunmuş zavodda indi 52 nəfər işləyir. Müəssisə tam gücü ilə işlədikdə burada 120 nəfər çalışacaq. Dövlət başçısı ayrı-ayrı sexlərdə istehsal prosesini izləyib, hazır məhsul nümunələrinə baxıb. həmin ərazidə yerləşən “Qafqaz MTZ” Məhdud Məsuliyyətli Cəmiyyətinin lift zavodu ilə tanış olub. Qeyd edək ki, Qalaqayın kəndində tikilmiş bu zavodda ildə yükqaldırma gücü 400 kiloqramdan 5 tonadək olan 5 min ədəd sərnişin və yük liftləri istehsal olunacaq. Hazırda müəssisədə 165 nəfər işləyir. Gələcəkdə işçilərin sayı 3200 nəfərə çatacaq. Müəssisənin tikintisinə 9 milyon manat sərmayə qoyulub.
Daha sonra prezident İlham Əliyev Sabirabad şəhərinin mərkəzində ucaldılmış Heydər Əliyevin abidəsini ziyarət edib, abidə önünə gül dəstəsi qoyub. Səfər çərçivəsində Sabirabadda Heydər Əliyev Muzeyinin açılış mərasimi keçirilib. Tikintisinə 2007-ci ildə başlanmış binanın sahəsi 487,8 kvadratmetrdir. Heydər Əliyev Fondunun təşəbbüsü ilə tikilmiş muzeyin yeddi bölməsində ümummilli liderin həyat və fəaliyyətinə dair fotoşəkillər, müxtəlif kitablar nümayiş etdirilir.
Dövlət başçısı həmçinin Sabirabad rayonunda Gənclər Evinin açılış mərasimində də iştirak edib. Gənclər Evinin ikimərtəbəli binasında kompüter otağı, elektron kitabxana, dərnəklər və vətənpərvərlik mövzusunda dərslərin keçirilməsi üçün otaqlar var. Binanın təmirinə 1,9 milyon manat vəsait sərf olunub. Burada 30 nəfər işlə təmin ediləcək. Bununla da dövlət başçısının Saatlı və Sabirabad rayonlarına səfəri başa çatıb.