Daxili siyasət

Ana səhifə

Daxili siyasət

Azərbaycan millət vəkilləri ziyalıların Milli Məclislə bağlı tənqidlərinə sərt cavab veriblər

07 noyabr 2008 17:12 (UTC +04:00)

Bakı. Elnur Məmmədli - APA. Bu gün bir qrup ziyalı Milli Məclisdə yazıçı və kinorejissor Rüstəm İbrahimbəyovla bağlı müzakirələrin aparılmasına etiraz olaraq bəyanat yayıb. APA-nın məlumatına görə, bəyanat müəllifləri R. İbrahimbəyovun müsahibəsi ilə bağlı parlamentdə müzakirənin aparılmasına ehtiyac olmadığını bildiriblər. Onların fikrincə, R.İbrahimbəyovun müsahibəsi kiminsə xoşuna gəlsə də, gəlməsə də, o öz düşündüklərini deyib və “bu, söz azadlığına” dəlalət edir.
Bəyanatı imzalayanlar Milli Məclisdə müzakirələrin açılmasına çox sərt yanaşaraq, bunu “parlamentarilərin siyasi mədəniyyətinin aşağı səviyyədə olmasının göstəricisi” kimi qiymətləndiriblər.
Müraciət müəllifləri R.İbrahimbəyovun fikirləri ilə razı olmayanların KİV-də və ya mətbuat konfransında fikirlərini bildirmələrini daha düzgün hesab ediblər.
Azərbaycan Milli Məclisinin üzvləri isə bəıyanata və bu sənəddə millət vəkillərinin ünvanlna səslənən ittihamlara sərt cavab veriblər.

Millət vəkili Aydın Mirzəzadə APA-ya bildirib ki, ölkəni mədəniyyət, etika səviyyəsinə çağıran insanlar öz bəyanatlarında təhqirə və alçaldıcı ifadələrə yol veriblər: “Mən çox təəssüf edirəm ki, o imzaların içərisində mənim sevdiyim və hörmət etdiyim şəxslər də var”.

Millət vəkili Qüdrət Həsənquliyev də yayılan bəyanatı pisləyib. O, bəyanat müəllifləri içərisində şəxsiyyətinə hörmət etdiyi şəxslərin də olduğunu, bundan təəssüfləndiyini də qeyd edib: “Rüstəm İbrahimbəyov uğursuz bir vaxtda bu kampaniyaya başlayıb. Ermənistanda ən radikal qüvvələr belə Qarabağ danışıqları vaxtı hökumətə qarşı kampaniyanı dayandırır. Amma prezidentlər arasında görüş ərəfəsində İbrahimbəyovun belə çıxışı və ardınca bir qrup ziyalının bəyanatla Milli Məclisi təhqir etməsi başadüşülən deyil. Bu yaxşı təşkil olunmuş bir aksiyadır, təsadüfi deyil, amma təəssüfləndiricidir”.

Millət vəkili Nizami Cəfərov isə APA-ya deyib ki, bəyanata imza atmış 200-dən artıq şəxin bir masa arxasında əyləşib bu sənədi hazırlamadıqları bəllidir: “O bəyanatı bir nəfər yazıb. Həmin şəxsin isə parlamentin iş reqlamentindən xəbəri yoxdur. Orada yazılıb ki, guya parlamentin iclası Rüstəm İbrahimbəyova həsr olunub. Bu belə deyil, orada sadəcə bir neçə depüutat bu məsələylə bağlı fikir bildirib. Məclisdə Rüstəm İbrahimbəyovu müdafiə edənlər də, onun fikrinə tənqidi yanaşanlar da çıxış etdi. Bəyanatda göstərilir ki, guya parlamentin iclasları yalnız dövlətçiliyə aid olan məsələlərə həsr edilməlidir. Biz də bu məsələni məhz millətə qarşı təhqir hesab etdiyimizdən müzakirəyə çıxarmışıq. Bu bəyanat qeyri-ciddi söhbətdir, mətləbdən yayınmaqdır. Rüstəm İbrahimbəyovu müdafiə etməyə ehtiyac yoxdur. Rüstəm İbrahimbəyov səhv danışıb, xalqı təhqir edib. Əgər o böyük yazıçıdırsa, belə danışmamalıdır. Parlamentdə olan mədəniyyətin səviyyəsini kimsə müəyyənləşdirə bilməz”.

Millət vəkilləri Siyavuş Novruzov və Eldar İbrahimov isə bəyanatla tanış olmadıqları üçün münasibət bildirmək istəmədiklərini deyiblər.