Daxili siyasət

Ana səhifə

Daxili siyasət

Azərbaycanda Konstitusiya dəyişikliklərinin əleyhinə olan müxalifət partiyaları yeni hərəkat yaradıb

09 yanvar 2009 15:07 (UTC +04:00)

Bakı. Elnur Məmmədli - APA. Bu gün Azərbaycanda Konstitusiyaya əlavə və dəyişikliklərin əleyhinə olan müxalifət partiyaları, qeyri-hökumət təşkilatlarının rəhbərləri və hüquq müdafiəçilərinin iştirakı ilə vahid mövqenin ortaya qoyulması ilə bağlı toplantı keçirilib. APA-nın xəbərinə görə, tədbirdə çıxış edən AXCP sədri Əli Kərimli partiyalar arasında müxtəlif məsələlərlə bağlı fikir ayrılıqlarının kənara qoyulmasını, antireferendum koalisiyasının yaradılması təklif edib. O, hüquqi subyekt olmaq üçün referendumla bağlı vahid təşviqat qrupunun yaradılmasının vacibliyini vurğulayıb: “Təkliflər var ki, bir neçə təşviqat qrupu yaransın. Lakin belə olsa, hakimiyyətin onların arasından seçim etmək imkanı olacaq”.

ADP sədri Sərdar Cəlaloğlu, Ümid Partiyasının sədri İqbal Ağazadə, Sülh və Demokratiya İnstitutunun sədri Leyla Yunus vaxtın az olduğunun qeyd edərək, vahid təşviqat qrupu yaradılması işinin tezləşdirilməsini və qrupun adının “Qarabağ” olmasını təklif ediblər.

Müsavat Partiyasının başqanı İsa Qəmbər isə vahid təşviqat qrupunun yaradılmasının tərəfdarı olmadığını açıqlayıb: “Bir neçə təşviqat qrupu olsa, imkanlarımız da geniş olar. Bu təşviqat qrupları arasında koalisiya da yaratmaq mümkündür”.

Milli Birlik Hərəkatının sədri Lalə Şövkət, “Azərbaycan Naminə” İctimai Forumun prezidenti Eldar Namazov, Ehtiyatda və İstefada olan Zabitlər Birliyinin sədri Yaşar Cəfərli, hüquqşünas Ənnağı Hacıbəyli isə ayrı-ayrı təşviqat qruplarının yaradılmasının əleyhinə olduqlarını bildiriblər. İclasda vahid mövqe əldə olunmadığına görə, müzakirələrin mətbuatın iştirakı olmadan davam etdirilməsi qərara alınıb.

Üç saata yaxın çəkən müzakirələr nəticəsində vahid təşviqat qrupunun yaradılması ilə bağlı razılıq əldə olunmayıb. Qapalı keçirilən toplantıdan sonra açıqlama verən Leyla Yunus deyib ki, iclasda “Qarabağ və Demokratik Respublika uğrunda” Vətəndaş Hərəkatının yaradılması ilə bağlı qərar qəbul olunub.

L. Yunus deyib ki, təşviqat qruplarının yaradılması ilə bağlı müzakirələr yanvarın 13-dək davam etdiriləcək və hərəkatın neçə təşviqat qrupunun olacağı resurslardan asılı olacaq.
Qeyd olunub ki, Hərəkata toplantıda iştirak edən siyasi partiyalar, hüquqşünaslar, QHT və mətbuat nümayəndələri daxildir.

Vətəndaş Hərəkatının Koordinasiya Şurasına isə Leyla Yunus rəhbərlik edəcək.

Konstitusiyaya_dəyişiklik