Daxili siyasət

Ana səhifə

Daxili siyasət

“İmmiqrasiya haqqında” qanuna əlavə və dəyişiklik edilməsi haqqında qanun layihəsi Milli Məclisin iclasına tövsiyə olunub

22 yanvar 2009 10:38 (UTC +04:00)

Bakı. Elbrus Seyfullayev-APA. Bu gün Milli Məclisin İnsan Hüquqları Daimi Komissiyasının iclası keçirilib. APA-nın xəbərinə görə, iclasda “İmmiqrasiya haqqında” qanuna əlavə və dəyişiklik edilməsi ilə bağlı layihə müzakirə olunub. Komissiya sədri Rəbiyyət Aslanova deyib ki, bu qanun qəbul olunduğu vaxtdan 10 ildən çox vaxt keçib və yeni dövrün yeni tələbləri yaranıb: “Dünya köçünün yeni mərhələsi başlanıb. Azərbaycana gələn miqrantların sayı artır. Dövlət bu məsələni diqqətdə saxlayır, onların hüquqlarını qoruyur”.
Məlumatlara əsasən təkcə son iki ayda Azərbaycana 7 minə yaxın miqrant gəldiyini də açıqlayan komissiya sədri deyib ki, qanuna əlavə və dəyişiklik miqrantların sənədlərinin qaydaya salınması ilə bağlıdır. Onun sözlərinə görə, miqrantların Azərbaycanda müvəqqəti yaşamaq üçün icazə almaları ilə bağlı vəsatət qaldırmaq üçün tələb olunan sənədlərin sırasına biri də əlavə olunur. Belə ki, indiyə kimi 7 sənəd tələb olunubsa, dəyişikliyə əsasən onların sayı 8 olacaq.
Millət vəkili Fuad Muradov isə deyib ki, bu qanuna ümumiyyətlə, yenidən baxılmalı, bir sıra məsələlərə əlavə və dəyişiklik etmək lazımdır. Deputat Azərbaycanda bir sıra miqrantların qeydiyyata düşmədiklərini, buna görə, vergidən yayındıqlarını açıqlayıb.

Müzakirələrdən sonra layihə Milli Məclisin iclasına tövsiyə olunub.