Daxili siyasət

Ana səhifə

Daxili siyasət

MSK «Respublikaçılar» Təşəbbüs Qrupunun müraciətlərini əsassız hesab edib

24 yanvar 2009 15:51 (UTC +04:00)

Bakı. Elnur Məmmədli – APA. Bu gün Mərkəzi Seçki Komissiyasının (MSK) növbəti iclası keçirilib. APA-nın məlumatına görə, iclasda «Respublikaçılar» Təşəbbüs Qrupunun səlahiyyətli nümayəndəsi Gülağa Aslanlının müraciətlərinə baxılıb. G. Aslanlı müraciətlərində bildirib ki, Təşəbbüs qrupu üçün Gəncə şəhərində imza toplayan partiyanın fəalları Nizami rayon Polis İdarəsinə aparılıb və onlara təzyiq göstərilib. MSK üzvü Ramiz İbrahimov məsələ ilə balı araşdırma aparıldığını, lakin müraciətdə göstərilənlərin təsdiqini tapmadığını deyib: «Nizami rayon Polis İdarəsinin rəisinə göndərdiyimiz sorğuya cavab olaraq bildirilib ki, sadəcə məsələylə bağlı vətəndaşlar onlara müraciət edib. Onlar öz müraciətlərində 2 müsavatçının şəhərin mərkəzində yerləşən çayxanaların birində İsrail-Fələstin müharibəsi barədə çıxışlar etdiyini və İsrail əleyhinə imza topladıqlarını bildiriblər. Vətəndaşlar polisə müraciətində aldadıldıqlarını qeyd ediblər. Polis rəisi isə cavab məktubunda bildirib ki, onlar müsavatçılara qarşı heç bir təzyiq göstərməyiblər. Bu şəxslərin polis idarəsinə çağırılmaları referendumla bağlı olmayıb”.

Digər müraciətdə isə G. Aslanlı Cəlilabad rayonunun Təzəkənd kəndində imza toplayan müsavatçının təzyiqlərə məruz qaldığını qeyd edib. MSK üzvü Qabil Orucov müraciətlə bağlı araşdırma aparıldığını, lakin bu hadisənin də təsdiqini tapmadığını qeyd edib. Hər iki müraciət əsassız hesab olunub.