Daxili siyasət

Ana səhifə

Daxili siyasət

Qənirə Paşayeva: “Bir millətin iki dili ola bilməz”

04 fevral 2009 16:47 (UTC +04:00)

Bakı. Kəmalə Quliyeva – APA. Millət vəkili Qənirə Paşayeva həmkarlarının Milli Televiziya və Radio Şurasının (MTRŞ) Türkiyədə istehsal olunan serialların dublyaj edilməsi ilə bağlı qərarının əleyhinə səsləndirdikləri fikirləri dəstəklədiyini bildirib. Q. Paşayeva APA-ya açıqlamasında Türkiyə filmlərinin və Türkiyə televiziyalarının verilişlərinin tərcüməsinin tələb edilməsini düzgün saymadığını deyib: “Azərbaycan bu gün türk xalqlarının qurultayına ev sahibliyi edir. Azərbaycan xaricdəki Azərbaycan və Türkiyə diaspor təşkilatlarının birgə fəaliyyətini önə sürən və bunun üçün addımlar atan bir ölkədir. Ümummilli lider Heydər Əliyevin də dediyi kimi, biz “bir millət, iki dövlət”ik. Belə olan halda, bu cür qərarların qəbul edilməsi anlaşılmazdır”.

Q. Paşayeva bəyan edib ki, bir millətin iki dili ola bilməz: “Bir millətin yalnız bir dili ola bilər. Azərbaycanın millət vəkilləri, rəsmi nümayəndələri Türkiyəyə gedəndə, eləcə də Türkiyənin nümayəndələri bura gələndə biz eyni dildə danışırıq və bir-birimizi çox yaxşı başa düşürük. Bu görüşlərdə tərcüməçilərdən istifadə olunmur. Bu baxımdan Türkiyə türkcəsində verilişlərin və serialların, xəbər proqramlarımızda Türkiyə rəsmilərinin çıxışları olan sinxronların tərcüməsi düzgün deyil. Mən ümid edirəm ki, bu məsələyə yenidən baxılacaq və yanlışlıq düzəldiləcək”.

Hazırda ortaq türk dilinin formalaşdırılması ideyasının irəli sürüldüyünü xatırladan millət vəkili qeyd edib ki, Azərbaycan Milli Televiziya və Radio Şurasının qərarı xoş olmayan nəticələrə gətirib çıxara bilər: “Türkiyə televiziyalarında çıxış edərkən söylədiklərimiz titrlə tərcümə olunsa, biz bunu necə qarşılayarıq? Bizim xəbər proqramlarımızda Türkiyə baş nazirinin və ya prezidentinin çıxışı subtitrlə verilsə, bu, Türkiyədə və bütün türk dünyasında yalnız mənfi əks-səda doğura bilər”.

Q. Paşayevanın sözlərinə görə, Milli Televiziya və Radio Şurasının qərarının nəticəsi bu olub ki, insanlar peyk və kabel televiziyalarına üstünlük verərək yenidən Türkiyə telekanallarını izləməyə başlayıblar: “Bəs Azərbaycan telekanallarında nə baş verdi? Türkiyə seriallarının yerini Azərbaycanın istehsalı olan proqramlar tutmadı. Əksinə, efir yenidən milli-mənəvi dəyərlərimizə yad olan Braziliya serialları ilə doldu. Halbuki Türkiyə serialları mini-mənəvi dəyərlərin aşılanması baxımından daha müsbət əhəmiyyətə malik idi”.

Q. Paşayeva bu məsələ ilə əlaqədar seçicilərdən xeyli müraciət aldıqlarını da açıqlayıb: “Biz həm öz mövqeyimizi, həm də seçicilərimizin fikirlərini lazımi instansiyalara çatdırmışıq”.

MTRŞ_türk_serial