Daxili siyasət

Ana səhifə

Daxili siyasət

AŞPA Monitorinq Komitəsinin həmməruzəçiləri qurumun növbəti sessiyasına qədər Azərbaycana səfər etməyəcəklər

06 sentyabr 2007 11:52 (UTC +04:00)

Bu barədə bu gün APA-ya eksklüziv açıqlamasında A. Herkel məlumat verib. Bu səfərin sessiyadan sonra baş tuta biləcəyini deyən həmməruzəçi gələn həftə Parisdə AŞPA Monitorinq Komitəsinin iclasının keçiriləcəyini söyləyib: “Mənim həmin iclasda Azərbaycanla bağlı çıxış etməyim iclasın gündəliyinə çıxarılan məsələlərdən asılıdır, gündəliklə isə hələ tanış deyiləm”. Bakıda səfərdə olan AŞ-nin İnsan Haqları üzrə Komissarı Tomas Hammarberqin eks-səhiyyə naziri Əli İnsanovla görüşməsinə münasibət bildirən həmməruzəçi bunu yaxşı hal adlandırıb. Amma həmməruzəçi T. Hammarberqin Bakıya səfəri ərəfəsində onunla görüşmədiyini və Ə. İnsanovla görüşməyi ona tövsiyə etmədiyini bildirib: “Komissar bizim gördüyümüz işlərlə onsuz da tanışdır”.
A. Herkel AŞ Nazirlər Komitəsinin “Aqo” qrupunun funksiyaları ilə həmməruzəçilərin funksiyalarının arasında fərqə dair sualı cavablandıraraq deyib ki, “Aqo” qrupunun üzvləri diplomatlar - AŞ-yə üzv ölkələrin daimi nümayəndələri, həmməruzəçilər isə milli parlamentlərin üzvləridir: “Ancaq hansısa mənada biz eyni işlə ilə məşğuluq. Mən “Aqo” qrupunun bir çox üzvü ilə görüşmüşəm və hesab edirəm ki, son zamanlar bu qrupun fəaliyyəti daha da dolğunlaşıb”.
Həmməruzəçi Bakıda hündür mərtəbəli binanın uçması nəticəsində yaşanan faciədən məlumatı olmadığını da qeyd edib. /APA/