Daxili siyasət

Ana səhifə

Daxili siyasət

Astara rayonunun Ərçivan kənd sakinləri Azərbaycan prezidenti İlham Əliyevə təşəkkür teleqramı göndəriblər

06 sentyabr 2007 15:44 (UTC +04:00)

Təşəkkür teleqramında dövlət başçısının hadisəyə dərhal reaksiya verməsi, hadisə yerinə baş çəkməsi, digər qurumların hadisədən zərərçəkən şəxslərə maraqlanmaları və həssas yanaşması vurğulanıb. Həlak olanların ailə üzvləri ilə yanaşı Ərçivan kəndinin ziyalıları və ağsaqqalları da ölkə başçısına təşəkkür ediblər.
Qeyd edək ki, Ərçivan kəndinin 20-dək sakini uçan binanın tikintisində çalışıb. Onlardan 6-sı bu qəzada həlak olub. Bunlar 1981-ci il təvəllüdlü Emil Seyfulla oğlu Babayev, 1968-ci il təvəllüdlü Arif Məhərrəm oğlu Feyziyev, 1977-ci il təvəllüdlü Habil Məhərrəm oğlu Feyziyev, 1982-ci il təvəllüdlü Sakit Adil oğlu Feyziyev, 1978-ci il təvəllüdlü Razi Elsevər oğlu İmaməliyev və 1984-cü il təvəllüdlü Nəzər Fərman oğlu Nəzərovdur. Onların cənazələri dağıntılar altından çıxarılandan sonra kəndlərinə yola salınıb və bütün xərclər dövlət tərəfindən ödənilib.
Qəza nəticəsində həlak olmuş Razi Elsevər oğlu İmaməliyevin ailəsi bu ağır günlərdə göstərilən yardıma görə həm prezidentə, həm də yerli icra strukturlarına təşəkkürünü bildirib. Bunu onun atası Elsevər İmaməliyev bildirib.
Arif və Habil Feyziyevlərin atası Məhərrəm kişi də göstərilən yardıma görə, təşəkkürünü bildirib. O, bu vəsaitin övladlarının məzarının üstünü götürülməsi, həm də onların azyaşlı övladlarının sosial problemlərinin həllinə kömək edəcəyini deyib. Məhərrəm Feyziyevin 11 övladı olub. Tikintidə qəza nəticəsində ölən Arif ailənin beşinci, Habil isə sonbeşik övladı olub.
Sakit Adil oğlu Feyziyev isə ailənin yeganə oğlu olub. Ailənin yeganə istəyi onun məzarının üstünü götürülməsidir.
Emil Seyfulla oğlu Babayevin atası Seyfulla Babayev isə oğlunun hər ay tikintidə 200-300 manat qazandığını söyləyib. O, oğlunun yaxın günlərdə toyuna hazırlaşdıqlarını, amma bunun qismət olmadığını deyib. Ölkə başçısına hadisəyə həssas yanaşması, onların dərdinə şərik çıxması üçün təşəkkürünü bildirən ata icra strukturlarının dəfnin xərclərini çəkdiyini bildirib.
APA-nın Mil-Muğan bürosunun əməkdaşı isə Sabirabad rayonunun Minbaşı kəndinin qəza nəticəsində həlak olan sakinlərinin ailələrinə baş çəkib. Bunlar 1964-cü il təvəllüdlü Valeh Abbas oğlu Orucov və 1971-ci il təvəllüdlü Seyidağa İsmayıl oğlu Fətullayevdir. Onlar dayıoğlu-bibioğludur.
S. Fətullayevin qardaşı Mirələkbər Fətullayev bildirib ki, Seyidağa “Mütəfəkkir” MTK tərəfindən inşa olunan binada bir ay suvaqçı kimi çalışıb. Onların 200-250 manat civarında əmək haqqı aldıqlarını deyən M. Fətullayev Seyidağanın 4 yaşında oğlu və 10 yaşlı qızı qaldığını deyib: “Biz hadisəyə bu qədər həssas və diqqətli yanaşdığı üçün prezident İlham Əliyevə minnətdarlığımı bildirirəm. Onun ayırdığı yardım Seyidağanın balalarının böyüməsinə, problemlərinin həllinə çox kömək edəcək”.
Valeh Orucovun isə 3 övladı var. Oğlu Anar hərbi xidmətdədir, qızları Günel 15, Gülnar 14 yaşındadır. Valehin atası, 80 yaşlı Abbas Orucov da maddi vəziyyətlərinin ağır olduğunu deyib: “Yası yola vermək üçün bizə yerli bələdiyyə rəhbərliyi yardım edib. Sabirabad Rayon İcra Hakimiyyətinin başçısı və Sabirabaddan seçilmiş millət vəkilləri yas mərasimlərində iştirak ediblər”. /APA/