Daxili siyasət

Ana səhifə

Daxili siyasət

Xələf Xələfov: “Dövlət sərhədinin delimitasiyası əlimizdə olan koordinatlar, normativ-hüquqi sənədlər əsasında həyata keçiriləcək”

07 sentyabr 2007 11:01 (UTC +04:00)

“Delimitasiya prosesində söhbət hər hansı əraziyə tarixi baxımdan kimin necə yanaşmasından yox, rəsmi, hüquqi sənədlər əsasında sərhədin haradan keçməsi, onun koordinatlarının müəyyən olunmasından gedir”. APA-nın məlumatına görə, bu sözləri Azərbaycan xarici işlər nazirinin müavini, delimitasiya və demarkasiya üzrə dövlət komissiyasının sədri Xələf Xələfov bu gün keçirdiyi mətbuat konfransında deyib. Azərbaycan-Gürcüstan sərhədində yerləşən Keşikçi dağı sərhəd sahəsi ilə bağlı mübahisələrə münasibət bildirən X. Xələfov həmin zonada dövlət sərhədinin dağ silsiləsindən keçdiyini söyləyib: “Biz bu istiqamətdəki sərhəd sahəsində müəyyən hissələri razılaşdırmışıq. Bəzi hissələr isə razılaşdırılmamış qalıb. Bu hissənin də dövlət komissiyaları çərçivəsində, danışıqlar çərçivəsində həll olunacağı gözlənilir. Əlimizdə olan materiallar, koordinatlar, normativ-hüquqi sənədlər əsasında dövlət sərhədinin delimitasiyası həyata keçiriləcək”. X. Xələfov bildirib ki, rəsmi Bakı iki qonşu dövlət arasında mövcud olan strateji tərəfdaşlıq, tarixi qonşuluq, dostluq münasibətlərini nəzərə alaraq bu məsələyə həssaslıqla yanaşır: “Çalışırıq ki, bu məsələni obyektiv və hüquqi baxımdan əsaslandırılmış surətdə elə həll edək ki, gələcəkdə fikir ayrılıqları ortaya çıxmasın”. /APA/