Daxili siyasət

Ana səhifə

Daxili siyasət

Sərdar Cəlaloğlu: “Mirmahmud Mirəlioğlu müxalifətin güc mərkəzini yaratmaq iqtidarında olan adam deyil”

01 dekabr 2007 11:10 (UTC +04:00)

“Müsavat, Demokrat, Liberal və Xalq Cəbhəsi partiyalarının son addımı özləri üçün problem yaradacaq. Onlar müxalifətdə olan hər kəsə qarşı müharibə elan ediblər. Özlərindən başqa heç kəsi bəyənmirlər. Bizim təşəbbüsümüzlə keçirilən toplantılara dəvət edilsələr də, qatılmırlar”. Klassik Xalq Cəbhəsi Partiyasının (KXCP) sədri Mirmahmud Mirəlioğlu APA-ya açıqlamasında bildirib ki, buna görə də 4 partiyanın qərarı yalnız özləri üçün keçərlidir.
Azərbaycan Xalq Cəbhəsi Partiyasının (AXCP) sədr müavini Həsən Kərimov və Müsavat Partiyasının Mərkəzi İcra Aparatının rəhbəri Arif Hacılı isə onların təmsil etdikləri partiyalara belə müraciətin daxil olmadığını deyiblər. H. Kərimov bildirib ki, belə müraciət olunsa, tədbirlərdə iştirakdan imtina etməzlər: “O şərtlə ki, müzakirə ediləcək məsələlər partiya maraqları ilə üst-üstə düşsün”.
Azərbaycan Demokrat Partiyasının (ADP) sədri Sərdar Cəlaloğlu isə məsələyə fərqli yanaşıb. O, hər toplantıda iştirakı məqbul hesab etmədiyini qeyd edib: “Bəzən Azərbaycanda siyasi qurumlar gücünə və imkanlarına xas olmayan təşəbbüslə çıxış edirlər. Faktiki olaraq, bu təşəbbüslər ölü doğulur. Əslində isə ideyaların irəli apara biləcək siyasi güclər tərəfindən müzakirəyə çıxarılması düzgündür. Bəzi siyasi partiyaların tədbirlərində ona görə iştirak etmirəm ki, həmin toplantılarda müzakirə olunan ideyalar, həmin məsələnin həyata keçirilməsindən daha çox arxivə göndərilməsinə səbəb olur. Bununla yanaşı, gərək təşəbbüs uğrunda mübarizə aparmayaq. KXCP-nin təşəbbüsü haqda isə məlumatsızam və hesab edirəm ki, Mirmahmud Mirəlioğlu müxalifətin güc mərkəzini yaratmaq iqtidarında olan adam deyil”. /APA/