Daxili siyasət

Ana səhifə

Daxili siyasət

Azərbaycanın bəzi müxalifət partiyaları Milli Demokratiya İnstitutunu məhkəməyə verəcəklərini bildiriblər

04 dekabr 2007 12:53 (UTC +04:00)

Bunu APA-ya ABŞ-ın Milli Demokratiya İnstitutunun (MDİ) Bakı ofisinin dəvətilə Polşada keçiriləcək tədbirə qatılacaq siyasi partiyaların sihahısına münasibət bildirən Bütöv Azərbaycan Xalq Cəbhəsi Partiyasının (BAXCP) beynəlxalq məsələlər üzrə katibi Elçin Mirzəbəyli bildirib. Onun sözlərinə görə, tədbirə YAP, ADP, AXCP və Müsavat partiyalarının dəvət edilməsindəki seçim prinsiplərinə aydınlıq gətirilməlidir: “YAP iqtidarı təmsil edir, bu aydındır, Müsavat isə parlamentdə nisbətən çox sayda millət vəkili ilə təmsil olunan müxalifət partiyasıdır. Amma bu gün nə AXCP-nin, nə də ADP-nin normal təşkilati strukturları mövcud deyil. Bu partiyalar MDİ kimi xarici qüvvələrin dəstəyi hesabına ölkənin siyasi səhnəsində mövcudluqlarını qoruyub saxlamağa çalışırlar”. BAXCP katibi hesab edir ki, MDİ-nin mövcud addımları ölkə Konstitusiyasının prinsiplərinə ziddir və heç bir xarici qüvvə Azərbaycanda fəaliyyət göstərən siyasi partiyaların təbliğat kampaniyasında iştirak edə bilməz. “Əgər bu proses davam edərsə, o zaman BAXCP ölkənin siyasi həyatına qeyri-qanıni müdaxiləsinə görə beynəlxalq təşkilatları, o cümlədən də MDİ-ni məhkəməyə vermək məcburiyyətində qalacaq”.
Böyük Quruluş Partiyasının (BQP) başqanı Fazil Qəzənfəroğlu isə MDİ-ni Azərbaycanda demokratiyanın inkişafında maraqlı olmamaqda ittiham edib. Bu qurum fırıldaqçılıqda ittiham edən BQP sədri MDİ-ni maddi əməkdaşlığı olan partiyalarla işləməkdə suçlayıb. F. Qəzənfəroğlu hesab edib ki, MDİ-nin Azərbaycan fəaliyyətinin boykot edilməsi olduqca vacibdir: “ Çünki demokratiyaya zərər vuran addımların ən çox bu qurumdan asılı olduğunu görürük. Ona görə də onun fəaliyyətinə inanmaq olmaz. Görünür ki, MDİ məhz bu 4 partiya ilə öz planlarını həyata keçirə bilirlər. Amma ümid edirəm ki, bu planlar uğurla həyata keçməyəcək. Çünki Azərbaycanın həqiqi demokratik qüvvələri bu kimi addımlara öz sözünü deyəcək”.
MDİ-nin Azərbaycan ofisinin proqram nümayəndəsi Elgün Tağıyev isə APA-ya açıqlamasında səslənən ittihamlara münasibət bildirməyib: “MDİ-nin Bakı ofisi mətbuata hər hansı açıqlama vermək səlahiyyətində deyil. Səslənən fikirlərə yalnız Vaşinqiton ofisi cavab verə bilər”. /APA/