Daxili siyasət

Daxili siyasət

Azərbaycan partiyaları 2007-ci ilin siyasi yekunlarını necə dəyərləndirir?

27 dekabr 2007 15:12 (UTC +04:00)

Bunu APA-ya açıqlamasında Yeni Azərbaycan Partiyası (YAP) sədrinin müavini, partiyanın icra katibi Əli Əhmədov 2007-ci ilin siyasi yekunlarına münasibət bildirərkən deyib. Ümumilikdə, 2007-ci ilin Azərbaycan üçün uğurlu olduğunu qeyd edən Ə. Əhmədov bu müddətdə ölkənin iqtisadi qüdrətinin artdığını, vətəndaşların sosial vəziyyətinin yaxşılaşması üçün hökumət tərəfindən tədbirlərin həyata keçirildiyini vurğulayıb: “Azərbaycan həm də regionda və beynəlxalq miqyasda mövqeyini möhkəmləndirib. Dağlıq Qarabağ münaqişənin nizama salınması istiqamətində də əhəmiyyətli irəliləyişlər əldə edilib”. Ə. Əhmədov 2007-ci ildə əldə olunmuş uğurların 2008-ci il üçün fundament rolunu oynayacağını qeyd edib: “2008-ci ildə keçiriləcək prezident seçkiləri İlham Əliyev və YAP üçün uğurlu olacaq. Bu iddianı irəli sürmək üçün əsaslar göz önündədir. Əhalinin mütləq əksəriyyəti indidən öz səsini İlham Əliyevə verməyə hazırdır”.
Müsavat Partiyasının başqanı İsa Qəmbər isə 2007-ci ilin Azərbaycanda qiymətlərin əsaslandırılmamış şəkildə artırılması ilə başladığını və bunun xalqın vəziyyətini daha da ağırlaşdırdığını bildirib: “İl ərzində iqtisadi azadlıqlar, insan haqları, mülkiyyət hüququ məhdudlaşdırılıb, jurnalistlər həbs olunub. İlin müsbət tərəfləri haqqında danışsaq, Azərbaycanın enerji və kommunikasiya məsələlərində əldə etdiyi müəyyən uğurlar qeyd olunmalıdır ki, bu da Azərbaycanın dünyada önəmini artırdı”. İ. Qəmbər prezident seçkilərinin keçiriləcəyini əsas gətirərək, 2008-ci ildə cəmiyyətin yenidən fəallaşacağını, vətəndaşların öz taleyinə sahib çıxarması üçün imkan yaranacağını deyib.
Azərbaycan Xalq Cəbhəsi Partiyasının (AXCP) sədri Əli Kərimli 2007-ci ilin Azərbaycanın tarixində ciddi problemlərlə qaldığını deyib. AXCP sədri də ilin əvvəlindəki kütləvi bahalaşma və jurnalistlərin həbsini qeyd edib: “Siyasi aksiyaların keçirilməsinə imkan verilməyib, siyasi fəaliyyət imkanları minimuma endirilib”. Ə. Kərimli ən önəmli və mənfi məqam kimi, ATƏT-in Minsk Qrupunun Qarabağ probleminin həlli ilə bağlı irəli sürdüyü təklifləri qeyd edib. 2008-ci ilin sərt keçəcəyini güman edən AXCP sədrinin fikrincə, dönüşə nail olmaq üçün müxalifət təşkilatları mümkün şərtlər və resurslarla mübarizə aparacaq.
Azərbaycan Demokrat Partiyasının (ADP) sədri Sərdar Cəlaloğlu 2007-ci il üçün Azərbaycanın siyasi həyatını bütövlükdə durğunluq kimi qiymətləndirib. Onun sözlərinə görə, istər müxalifət, istər iqtidar düşərgəsində əhəmiyyətli hadisə baş verməyib: “Nazirlərlə bağlı məhkəmələrin başa çatması, ADP-də baş verənləri və ADP-nin siyasi kursunu dəyişməsini mühüm hadisə hesab edirəm. Ölkədəki durğunluq fonunda bunlar ciddi hadisələr olub”. S. Cəlaloğlu 2008-ci ildə mühüm hadisələrin gözlənildiyini bildirib: “Prezident seçkiləri ən mühüm hadisə olacaq. Gələn il Ermənistanda, Rusiyada və ABŞ-da keçiriləcək seçkilər də Azərbaycan üçün təsirsiz ötüşməyəcək”.
Azərbaycan Milli İstiqlal Partiyasının lideri Etibar Məmmədov isə 2007-ci ildə mühüm hadisənin baş vermədiyini əsas gətirərək sorğuda iştirak etmək istəməyib. /APA/