Daxili siyasət

Daxili siyasət

Piter Semnebi, Andres Herkel və Yevgeniya Jivkova əfv fərmanını alqışlayıblar

28 dekabr 2007 16:44 (UTC +04:00)

P. Semnebi APA-ya açıqlamasında deyib ki, hələlik əfv siyahısında kimlərin adının olduğunu bilmir: “Ancaq bu qərar təbii ki, çox müsbət addımdır”. Xüsusi nümayəndənin sözlərinə görə, Azərbaycanda siyasi məhbusların olması və jurnalistlərin həbsi Avropa Birliyini həmişə narahat edib və bu qurum əfvdən şad olacaq. Bununla yanaşı, P. Semnebi əlavə edib ki, həbsdə qalan digər jurnalistlər də azadlığa buraxılsa, pis olmaz.
Avropa Şurası Parlament Assambleyasının Monitorinq Komitəsinin Azərbaycan üzrə həmməruzəçisi Andres Herkel də əfv fərmanını alqışlayıb: “Əlbəttə, bu, pozitiv addımdır, amma əfv olunmaq məhkəmə qərarının ləğv edilməsi deyil və onların məhkumluğu qalır. Əfv olunanlar arasında bizim adını çəkdiyimiz bir çox adamın adı yoxdur. Məsələn, Eynulla Fətullayev, Mirzə Sakit, Rasim Əkbərov əfv olunmayıblar”.
Avropa Şurası Parlament Assambleyasının Monitorinq Komitəsinin Azərbaycan üzrə həmməruzəçisi Yevgeniya Jivkova da əfv fərmanından şad olduğunu deyib və Yeni il ərəfəsində baş verən bu xoş hadisə münasibətilə Azərbaycan xalqını təbrik edib: “Mən həmin insanların Yeni ili öz ailələrinin əhatəsində qeyd edəcəyindən çox şadam”. Y. Jivkova ümid etdiyini bildirib ki, bu pozitiv tendensiya davam edəcək.
“ATƏT-in Demokratik Təsisatlar və İnsan Haqları Bürosu Azərbaycan prezidenti İlham Əliyevin siyasi məhbuslar və jurnalistlərin azad edilməsi barədə qərarını dəstəkləyir”. Bunu isə APA-ya ATƏT-in Demokratik Təsisatlar və İnsan Haqları Bürosundan bildiriblər. Bürodan qeyd ediblər ki, insanları fikirlərinə və çıxışlarına görə yox, kriminal əməllərinə görə həbsxanaya salmaq lazımdır. ATƏT DTİHB müsbət tendensiyanın davamlı olacağına ümid edir. /APA/