Daxili siyasət

Ana səhifə

Daxili siyasət

Azərbaycanda siyasi partiyalar prezident seçkilərinə hazırlıqlara start veriblər

09 yanvar 2008 09:25 (UTC +04:00)

Partiyanın prezident seçkilərinə hazırlıqla bağlı proqramının mövcud olduğunu deyən S. Novruzov seçki gününə kimi atılacaq hər bir addımın planlaşdırıldığını qeyd edib: “Proqram üç hissədən ilkin dövr, əsas dövr, seçkidən sonrakı dövrdən ibarətdir. Fevralın 1-dən proqramın birinci hissəsinin ikinci bəndi həyata keçiriləcək. İyuna kimi davam edəcək bu müddət ərzində seçki platforması, plakatların növləri, reklam rolikləri, görüşlər hazırlanacaq. Seçkilərə start veriləndə bütün məsələlərə hazır olacağıq”. S. Novruzov YAP-ın seçkilər zamanı mitinqlərdən istifadə edəcəyini də bildirib: “YAP həmişə yeni texnologiyalardan istifadə edib və bu dəfə də seçicilərlə görüşlərin müxtəlif növlərindən istifadə edəcəyik. Kütləvi aksiyalar, fərdi qaydada görüşlər, “qapı-qapı”, televiziya, radio, mətbuat, internet və nə qədər yeni texnologiyalar var, onların hamısından istifadə ediləcək”.
Müsavat Partiyasının başqanı İsa Qəmbər APA-ya açıqlamasında partiyanın 2008-ci ildə fəaliyyətinə dair proqram hazırlandığını və yaxın zamanlarda bu sənədin seçkili orqanlarda təsdiq olunacağını bildirib: “Biz həmin proqrama əsasən fəaliyyət göstərəcəyik. Təbii ki, bütün seçkilərdə olduğu kimi, bu seçkilərdə məqsədimiz təkcə qalib gəlmək deyil, eyni zamanda seçkinin azad və ədalətli keçməsi uğrunda mübarizə aparmaqdır. Bu, həm seçkiyə qədər, həm də seçki müddətində olacaq”. İsa Qəmbər bildirib ki, seçkilərin azad və ədalətli keçməsi üçün mümkün olan bütün addımlar atılacaq. O, partiyanın qarşısında duran vacib məsələlər arasında Seçki Məcəlləsinin dəyişdirilməsi, seçki komissiyalarının paritet əsaslarla formalaşdırılması kimi vacib məsələlərin olduğunu vurğulayıb.
Milli Birlik Hərəkatının lideri Lalə Şövkət prezident seçkiləri ilə bağlı “Azadlıq” blokunda birgə qərar veriləcəyini deyib. Onun sözlərinə görə, ölkədə demokratik şərait yaradılmasa, blok seçkilərdə iştirak etməyəcək: “Biz bu şouda epizodik rol almaq istəmirik. Ona görə belə düşünürəm ki, ilin birinci yarısında bütün səyləri demokratik şəraitin yaradılmasına yönəltməliyik. Seçki komissiyalarının hakimiyyətin nəzarəti altında olduğu bir vaxtda demokratik seçki keçirmək mümkün deyil”.
Ümid Partiyasının sədri İqbal Ağazadə də prezident seçkiləri ilə bağlı proqram hazırlandığını deyib: “Bundan əvvəlki illərdə də fəaliyyət proqramlarımız olub. 2008-ci illə bağlı proqramımızı isə yanvarın 15-dən həyata keçirilməyə başlayacağıq”.
Azərbaycan Demokrat Partiyasının (ADP) sədri Sərdar Cəlaloğlu isə partiyada prezident seçkiləri ilə bağlı müzakirələrin yeni başlandığını bildirib. Onun sözlərinə görə, ADP qurultayının seçkilərdə iştirakla bağlı qərarı var: “Sadəcə, iştirakın taktiki məsələlərini həll etmək İdarə Heyətinə və Məclisə həvalə olunub. Fevralın əvvəlində Məclisi çağırıb seçkilərdə iştirak formasını müəyyənləşdirəcəyik”.
Azərbaycan Xalq Cəbhəsi Partiyası (AXCP) Ali Məclisinin sədri Qulamhüseyn Əlibəyli APA-ya açıqlamasında “Azadlıq” blokunun əsas məqsədinin seçki komissiyalarının tərkibinin dəyişdirilməsi olduğunu bildirib. Yalnız seçki qanuvericiliyi dəyişdiriləndən sonra seçkilərdə iştirak məsələsinə baxılacağını deyən Q. Əlibəyli blokun proqramında indiki məqamda yalnız bu məsələnin mövcud olduğunu vurğulayıb: “Buna nail ola bilsək, seçkilərdə vahid namizədlə iştirak məsələsini həll edəcəyik. Bu məsələdə problem olmayacaq”. Seçkilər ərəfəsində yeni seçki bloklarının yaradılmasına gəldikdə, Q. Əlibəyli bildirib ki, Azərbaycan təcrübəsi bunun o qədər də uğurlu olmadığını göstərir: “Bizdə seçki bloklarının yaradılması şərti xarakter daşıyır. Azərbaycanda bir neçə partiya var ki, onlar seçkilərdə təkbaşına iştirak etsələr, daha yaxşı olar”.
Ana Vətən Partiyasının sədri Fəzail Ağamalı seçkilərdə əsas hədəfin İlham Əliyevin qalib gəlməsi uğrunda olduğunu deyib. Bununla bağlı partiyanın proqramının mövcud olduğunu deyən F. Ağamalı hər hansı seçki blokunun yaranacağını güman etmədiyini də deyib: “Əgər YAP qərara alsa ki, İlham Əliyevin namizədliyinin irəli sürülməsi üçün vahid bloka ehtiyac var, yəqin ki, biz də o blokda olacağıq”.
Açıq Cəmiyyət Partiyasının (ACP) sədri Akif Şahbazov partiyanın seçkilərlə bağlı fəaliyyətinin əsas istiqamətinin eks-spiker Rəsul Quliyevıin Azərbaycana qayıdışını təmin etməkdən ibarət olduğunu deyib: “Bir çox partiyalardan fərqli olaraq bizim birinci işimiz namizədin irəli sürülməsi yox, namizədin Azərbaycana gəlişinə nail olmaqdır. Bu baş tutandan sonra digər məsələlər də konkretləşəcək”.
Vətəndaş Həmrəyliyi Partiyasının (VHP) sədri Sabir Rüstəmxanlı sonuncu qurultayda partiyanın seçkilərdə öz namizədi ilə iştirak etmək barədə qərar qəbul edildiyini bildirib: “Amma eyni zamanda Məclisə səlahiyyət verilib ki, sonrakı mərhələdə vəziyyətə uyğun olaraq qərarlar qəbul etsin. Ona görə də atacağımız konkret addımlarla bağlı indidən danışmaq tezdir”.
Azərbaycan Milli İstiqlal Partiyasının (AMİP) mətbuat və təbliğat katibi Əli Orucov hələlik partiyanın seçkilərlə bağlı proqramının olmadığını deyib. AMİP-in seçkilərdə iştirak etmək fikrində olduğunu deyən Əli Orucov partiya lideri Etibar Məmmədovun namizədliyinin irəli sürülməsinə çalışacaqlarını qeyd edib: “Amma buna nail ola bilməsək, başqa namizəd irəli sürəcəyik. Həmçinin seçki platforması AMİP-in hədəfləri ilə uyğun olan hər hansı namizədə də dəstək verə bilərik”. /APA/