Daxili siyasət

Daxili siyasət

Gürcan Dağdaş: “Qardaslarımızın torpaqları işğal altında olarkən Ermənistanla sərhədi açmaq türkə yaraşmaz”

11 yanvar 2008 13:35 (UTC +04:00)

- PKK terrorunun kökünü kəsmək məqsədilə hökumətin bəzi siyasi addımlar ata biləcəyindən söhbət gedir. Vaşinqtondan verilən bəzi açıqlamalarda bunun işarələrini sezmək mümkündür. Bu barədə nə deyə bilərsiniz?
- Baş nazirin Vaşinqtona səfərindən sonra prezidentin səfərində də gündəliyə gələn, ancaq heç cür elan edilməyən siyasi kurs izləməkdəyik. ABŞ səlahiyyətli nümayəndələrinin ad çəkmədən PKK terror təşkilatının aradan qaldırılması ilə birlikdə ümumi amnistiyaya (hətta təşkilatın bir çox üzvünün siyasətə qoşulması da daxil olmaqla) işarə edən açıqlamaları var. Hörmətli baş nazirin də, hörmətli prezidentin də bu iddiaları inkar etmək məcburiyyəti hiss etdiklərini görürük. Amma ABŞ nümayəndələrinin danışdıqları şeylər böyük ehtimalla müzakirə olunmuş mövzulardır. Hökumət “peşmançılıq qanunu” deyilən terrorla mübarizə qanununun əhatəsini genişləndirmək istəyir və hörmətli baş nazir dağdakı terrorçulara “ata-ananızın yanına qayıdın” deyir. Bu, ümumi əfvin qoxusunu verən açıqlamalardır ve amerikalılar məsələnin siyasi həllinə vurğu edərkən bunu nəzərə çatdırmağa çalışırlar. Türkiyədə dağa çıxana “ata-ananın yanına qayıt” deyən baş nazirin torpağa düşən şəhidlərə “ata-ananın yanına qayıt” demək imkanı yoxdur. Çünki şəhidlər torpağın altındadır və ailələri qədər biz də onlarla şərəf duyuruq. Vətən üçün şəhid olanları geriyə qaytara bilmiriksə, onaları şəhid edənləri geriyə çağırmaq şəhidlərimizin xatirəsinə böyük hörmətsizlikdir.
- Terror təşkilatına siyasi amnistiyadan söhbət getdiyi bir vaxtda Avropa Birliyi də Cinayət Məcəlləsinin türklüyün təhqir olunmasına görə cəza nəzərdə tutan 301-ci maddəsinin tamamilə ləğv edilməsini istəyir...
- Hazırda sadəcə, PKK-nın lövhəsini aradan qaldırmaq istəyirlər, onun ideologiyasını isə Ankaranın tərəf-müqabil kimi qəbul edə biləcəyi bir vəziyyətə gətirmək niyyətindədirlər. PKK terror təşkilatına qarşı cəmiyyətdə yaranmış qəzəbin soyudulması məqsədilə siyasi oyunların oynandığı bir psixoloji hərb dövrü keçiririk. Terrorçulara əfv, 301-ci maddənin ləğvi, kürd dilində təhsil və digər bu kimi məsələlərin arxasında ABŞ və AB dayanır. Cəmiyyəti bu güzəştlərə hazır vəziyyətə gətirməyə çalışsalar da, biz Milliyyətçi Hərəkat Partiyası olaraq parlamentdə Türkiyənin birlik və bütövlüyünü poza biləcək hər addımın önündə aslanlar kimi duracağıq.
- Türkiyəyə qarşı psixoloji hərbdən və partiyanızın buna qarşı müqavimətindən bəhs etdiniz. Son günlərdə önəmli addımlarınızdan biri də Novruzun rəsmi bayram elan edilməsi ilə bağlı parlamentə təqdim etdiyiniz qanun təklifidir...
- Novruz bu torpağın insanlarının minillər boyu qeyd etdiyi bir ənənədir. Bunu hər hansı təşkilatın öz xalqının bayramı kimi bizə təqdim etməyə çalışmasına son qoymaq üçün dövlət qərarına ehtiyac vardı və biz də bu məqsədlə qanun təklifi vermişik. Novruz bizim bayramımızdır və onu türkün, kürdün birlikdə qeyd edə biləcəyi müştərək platformaya daşımaq lazımdır. Novruzdan öz məqsədləri üçün istifadə etməyə çalışanların qarşısını almaq və bu bayramın öz mahiyyətinə uyğun qeyd edilməsi üçün cəhd göstəririk.
- Yeni il gələn kimi,Qərbdə Türkiyə-Ermənistan sərhədinin açılmasına dair çağırışlar səslənməyə başladı. Onlar iki ölkə arasında ticarət dövriyyəsinin artmasının Türkiyə iqtisadiyyatına da müsbət təsir göstərəcəyini bildirirlər. Siz sərhəd bölgəsindən seçilmiş millət vəkili kimi bu təklifləri necə dəyərləndirirsiniz?
- Ermənistanın büdcəsinə nəzər saldıqda, bu ölkə ilə ticarətimizin bizə ciddi fayda verməyəcəyini görə bilərik. Bu tələblərin arxasında başqa niyyətlər dayanır. Ermənistan beynəlxalq arenada Türkiyəni qatil, cani kimi göstərməyə çalışarkən, qardaş Azərbaycanın torpağını işğal edərkən bizə bu ölkə ilə 3-5 lirəlik ticarət etmək yaraşarmı? Həm bizi söyən, həm də Azərbaycan torpaqlarını qəsb edən, hüquq tanımayan bir dövlətin əlini necə sıxa bilərik? Bu, türkə yaraşmaz və bu addımı atmağa da heç kimin gücü çatmaz. Uzun müddətdən bəri Ermənistanla sərhədin açılmasının Türkiyə iqtisadiyyatına faydası olacağına dair iddialar ortaya atılır, ancaq bunun ictimaiyyət tərəfindən qəbul edilməsi mümkün deyil. Dövlətin də bu tələblərə müsbət cavab verməsi mümkün görünmür. /APA/