Daxili siyasət

Daxili siyasət

Çingiz Əsgərov Azərbaycanın Avropa İnsan Haqları Məhkəməsinə təqdim etdiyi hakim siyahısına etiraz edənləri ermənilərin xeyrinə işləməkdə günahlandırıb

12 yanvar 2008 09:56 (UTC +04:00)

Hüquq Maarifçiliyi Cəmiyyətindən APA-ya verilən məlumata görə, müraciəti hüquqşünaslar İntiqam Əliyev, Ənnaği Hacıbəyli, Əlövsət Əliyev, Rəşid Hacılı, Hafiz Həsənov, hüquq müdafiəçiləri Leyla Yunus və Əvəz Həsənov imzalayıb. Müraciətdə qeyd olunub ki, Avropa Məhkəməsinin hakimi vəzifəsinə ölkəmizdən namizədliyi irəli sürülən şəxslərdən ikisi cəmiyyətdə o qədər də tanınmırlar. QHT rəhbərləri bu siyahının formal xarakter daşıdığını, hazırda Avropa Məhkəməsinin hakimi olan Xanlar Hacıyevlə müqayisədə digər iki namizədin faktiki heç bir şansının olmamasının indidən aydın olduğunu vurğulayıblar.
Müraciət müəllifləri AŞ PA-nı Azərbaycanın irəli sürdüyü namizədlər siyahısını yenidən Azərbaycan hökumətinə geri qaytarmağa çağırıb.
Azərbaycanın Avropa Məhkəməsindəki nümayəndəsi Çingiz Əsgərov isə APA-ya açıqlamasında bildirib ki, müraciət müəllifləri Azərbaycan dövlətinin mənafeyinə zidd addım atıblar: “Ötən dəfə də Azərbaycan hökuməti Avropa Şurasına hakimliyə namizədlərin siyahısını təqdim edəndən sonra özünü hüquqşünas və hüquq müdafiəçisi adlandıran şəxslər eyni məzmunlu məktubla müraciət etmişdilər. O zaman da onlar iddia etmişdilər ki, guya Azərbaycanda həyata keçirilən prosedur şəffaf olmayıb. Ona görə də Avropa Şurasının Parlament Assambleyası siyahını geri qaytardı. Azərbaycanın Məhkəmə-Hüquq Şurası Parlament Assambleyasının bütün müvafiq tövsiyələrini rəhbər tutaraq elanlar yerləşdirib və namizədlərin müəyyənləşməsi ilə bağlı prosedurlar həyata keçirib. Bütün qeyri-hökumət təşkilatları, hüquqşünaslar və digər hüquq təşkilatları namizədlərini təqdim etməyə dəvət olunmuşdular. Azərbaycan namizədlərin müəyyənləşməsi zamanı AŞ PA-nın bütün tövsiyələrinə əməl edib. Mən hesab edirəm ki, növbəti dəfə Avropa Şurasına müraciət edən şəxslər Azərbaycan dövlətinin mənafelərinə zidd olaraq çıxış edirlər. Bu, ermənipərəst qüvvələrin sifarişidir. Hazırda Azərbaycandan olan məcburi köçkünlərin Ermənistana qarşı iddialarına Avropa Məhkəməsində baxılmaq üzrədir. Orada aparılacaq müzakirələr zamanı Azərbaycandan olan güclü hüquqşünas-hakim çıxış etməlidir. Bəzi ermənipərəst qüvvələr buna maneçilik törətmək istəyirlər. Onlar istəmirlər ki, Azərbaycandan Avropa Məhkəməsində güclü hakim təmsil olunsun”.
Ç. Əsgərov deyib ki, Azərbaycan hökumətinin təqdim etdiyi hər üç namizəd güclüdür: “Onların üçü də hakimdir, ingilis dilində sərbəst danışa bilirlər, Avropa İnsan Hüquqları Konvensiyasını, Avropa Məhkəməsinin presedent hüququnu yaxşı bilirlər. Onların hər biri Azərbaycanı layiqincə təmsil edə bilər”.
Xatırladaq ki, Azərbaycan hökuməti Avropa Məhkəməsinə hazırda qurumun hakimi olan Xanlar Hacıyevlə yanaşı, Əzizbəyov Rayon Məhkəməsinin hakimi Rəşad Həsənov və Nəsimi Rayon Məhkəməsinin hakimi Aygün Abdullayevanın namizədliyini irəli sürüb. /APA/