Daxili siyasət

Daxili siyasət

Bakı şəhər İcra Hakimiyyəti mitinqlər və küçə yürüşləri üçün müəyyənləşdirilmiş yerləri dəyişməyib

12 yanvar 2008 09:57 (UTC +04:00)

Bakı şəhər İcra Hakimiyyəti (BŞİH) yaxın vaxtlarda bir neçə ictimai təşklatın kütləvi aksiyaların keçirilməsi üçün şəhər rəhbərliyi tərəfindən ayrılmış yerlərin siyahısının açıqlanması ilə bağlı müraciətinə cavab verəcək. BŞİH-nin siyasi partiyalar və ictimai təşkilatlarla iş şöbəsinin müdiri Zaur Ramazanov APA-ya bildirib ki, kütləvi tədbirlər üçün ayrılmış yerlərin siyahısına hər hansı dəyişiklik edilməyib. Onun sözlərinə görə, 2006-cı ildə mitinqlər üçün 4, küçə yürüşləri üçün 3 yer müəyyənləşdirilib. Mitinqlər üçün “Nefçilər” İdman Sağlamlıq Mərkəzinin Bibiheybətdəki stadionu, Rüstəm Rüstəmov küçəsindən Heydər Əliyev adına Bakı neft emalı zavoduna doğru gedən yoldakı meydan, Ukrayna meydanı, “Neftçi” İdman Sağlamlıq Mərkəzinin Tofiq İsmayılov adına stadionu ayrılıb. Küçə yürüşləri üçün isə metronun “Neftçilər” stansiyası yanından (Dakar meydanından) başlayaraq Rüstəm Rüstəmov küçəsindən keçməklə Heydər Əliyev adına Bakı neft emalı zavodunun yaxınlığındakı meydana qədər 1600 metrlik məsafə, metronun “Həzi Aslanov” stansiyasının yanından başlayaraq Məhəmməd Hadi kuçəsindən keçməklə Ukrayna meydanınadək 1200 metrlik məsafə və Səttar Bəhlulzadə adına meydandan “Neftçi” İdman-Sağlamlıq Mərkəzinin Tofiq İsmayılov adına stadionunadək 1000 metrlik məsafə müəyyənləşdirilib. /APA/