Daxili siyasət

Ana səhifə

Daxili siyasət

Müsavat Partiyası Məclisinin iclasında qalmaqal baş verib

27 yanvar 2008 11:47 (UTC +04:00)

Birinci məsələnin müzakirəsi qalmaqal yaradıb. Neftçala və Şəmkir rayon təşkilatlarının yeni sədrlərinin səlahiyyətlərinin təsdiqi həyata keçirilsə də, Sabirabad rayon təşkilatının yeni sədrinin təsdiqi ciddi qarşıdurmaya səbəb olub. Məclis sədri Sülhəddin Əkbər bildirib ki, MNTK üzvü Rüfət Sultanlı rayon təşkilatının konfransında iştirak edib və verdiyi arayışda ciddi Nizamnamə pozuntularının olduğunu deyib. O, öz arayışında konfransda yetərsayın olmadığını, konfrans nümayəndələrinin müəyyənləşməsi prinsiplərində Nizamnamə pozuntularına yol verildiyini qeyd edib. S. Əkbər həmçinin rayon müsavatçıları adından rəhbərliyə anonim məktubun daxil olduğunu və burada ciddi pozuntularla bağlı xəbər verildiyini vurğulayıb. Partiyanın təşkilat şöbəsinin müdiri Söhrab Məhərrəmli əyalətlərdə müsavatçı və təşkilat sədri olmağın çətinliyindən danışıb: “MNTK-nın dediyi ilə oturub dursalar, onda partiyanın yerli təşkilatlarının 80 faizi səlahiyyətli olmaz. Ona görə də Nizamnamənin bəzi bəndlərinin yerinə yetirilməməsinə dözmək olar. Burada araşdırmalı bir şey yoxdur”.
Müsavatın Mərkəzi İcra Aparatının rəhbəri Arif Hacılı məsələ ilə bağlı millət vəkili İkram İsrafillə birgə Sabirabadda olduqlarını, partiya Şurasının qərarı ilə konfransın təyin edildiyini qeyd edib. Onun sözlərinə görə, rayon təşkilatının bir hissəsi konfransı boykot edib. Konfransdan sonra rəhbərliyə hər hansı şikayətin daxil olmadığını bildirən A. Hacılı sədrin təsdiq olunmaması üçün heç bir əsasın olmadığını vurğulayıb.
Məclis üzvü Hikmət Hacızadə isə Nizamnamə pozuntularının əleyhinə olub: “Biz Nizamnaməni poza bilmərik. Çünki bu, sonradan davamlı prosesə çevrilər və nəhayət, Brejnev sayağı idarəçiliyə gətirib çıxarar”. O, rayon təşkilatında baş verənlərdən xəbərsiz olduğunu dedikdə, A. Hacılı “məsələdən xəbəri olmayanları filosofluq etməməyə” çağırıb. H. Hacızadə isə cavabında Müsavatda vəziyyətin ağır olduğunu, fiziki gücün az olduğunu deyib və buna görə də mənəvi gücə çevrilməyin vacibliyini vurğulayıb.
Bundan başqa, Məclis sədri S. Əkbərlə A. Hacılı arasında mübahisə yaranıb. A. Hacılı onu məsələdən xəbəri olmayan adamlara söz verməkdə, lakin prosesin içərisində olanlara söz verməməkdə ittiham edib. Osman Kazımov isə imzasız məktublar əsasında uzun müzakirələrin aparılmasına etiraz edib: “Elə etməyin ki, o məktubu ekspertizaya verim və görüm kim tərəfindən yazılıb. Belə oyun oynamaq kimin nəyinə lazımdır? Mən öz fikrimi deyirəm. Nə Arif Hacılının, nə Sülhəddin Əkbərin, nə də Vurğun Əyyubun qrupunu təmsil etmirəm. Amma xahiş edirəm obyektiv, vicdanlı olun. Belə olmaz. Bir saatdır bir rayonun məsələsini müzakirə edirik. Oradan imzasız bir şey gəlib, onu müzakirə edirik. O məktubu yazan gəlsin burada kişi kimi desin ki, məsələ belə olub”.
Mübahisələrə baxmayaraq, səsvermə nəticəsində rayon təşkilatında keçirilən konfrans 39 nəfər lehinə, 4 nəfər əleyhinə olmaqla səlahiyyətli sayılıb. Səsvermədən sonra çıxış edən partiya başqanı İsa Qəmbər Məclisin doğru qərar qəbul etdiyini deyib: “Heç bir reallıq Nizamnamədən üstün olmamalıdır. Nə qədər ki, mən bu partiyaya rəhbərlik edirəm, Nizamnamə pozuntusuna yol verilməyəcək”. Ağcabədi rayon təşkilatında keçirilən konfransda da müəyyən pozuntuların olması ilə bağlı iddialar səslənsə də, Məclis bu konfransı da səlahiyyətli sayıb.
Daha sonra iclasda 2007-ci ilin iqtisadi yekunlarına dair partiyanın İqtisadi siyasət komissiyasının sədri Qubad İbadoğlu məruzə ilə çıxış edib. Məclisin iclası davam edir. /APA/