Daxili siyasət

Ana səhifə

Daxili siyasət

Azər Mürsəliyev: “Rusiyanın Qəbələ RLS-dən birgə istifadə barədə təklifi informasiya müharibəsində bir gediş idi”

29 yanvar 2008 09:16 (UTC +04:00)

- Prezident seçkiləri ərəfəsində Rusiyada yaranmış siyasi vəziyyəti necə qiymətləndirirsiniz?
- Seçkilərlə bağlı yeganə intriqa Dmitri Medvedevin nə qədər səs toplayacağından ibarətdir Vladimir Putindən çox, yoxsa az. Seçkilərin özü artıq heç kim üçün maraq kəsb etmir, çünki faktiki olaraq baş tutub. Qarşıdakı səsvermə isə yerinə yetirilməsi vacib ritual olmaqdan uzağa getməyəcək. Müxalifətin dağıldığını nəzərə alsaq, yaxın gələcəkdə siyasi aktivliyin əsasən hakim partiya daxilində müxtəlif qruplaşmaların gizli mübarizəsi şəklində özünü göstərəcəyini söyləyə bilərik.
- Azərbaycanla Rusiya arasındakı münasibətlərin indiki səviyyəsi haqqında nə düşündüyünüzü bilmək maraqlı olar. Məlum olduğu kimi, Vladimir Putinin prezidentliyi dövründə iki ölkə münasibətləri normallaşıb. Rusiyada keçiriləcək prezident seçkilərindən sonra bu istiqamətdə hər hansı dəyişiklik gözlənilirmi?
- Azərbaycanla Rusiya arasındakı münasibətlərin indiki səviyyəsi kifayət qədər qənaətbəxşdir. Dəyişikliklər baş versə belə, prezident seçkiləri ilə əlaqədar olmayacaq. Çünki Rusiyada əvvəlki komanda və əvvəlki lider Vladimir Putin hakimiyyətdə qalacaq.
- Dağlıq Qarabağ münaqişəsinin həlli ilə bağlı danışıqlar prosesinin perspektivləri haqda nə deyə bilərsiniz?
- Hesab edirəm ki, bu il danışıqlar prosesində hər hansı ciddi irəliləyiş gözləməyə dəyməz. Ermənistanda və Azərbaycanda prezident seçkiləri keçiriləcək, seçki ilində isə ciddi danışıqlar aparılmır.
- Sizcə Qəbələ RLS-dən birgə istifadə barədə Vladimir Putinin təklifi reallaşa bilərmi? Azərbaycan bundan nə itirə və ya nə qazana bilər?
- Mənə elə gəlir ki, bu mövzu artıq öz aktuallığını itirib. Üstəlik, bu təklif informasiya müharibəsində bir gediş idi. Moskva bu təklifi Şərqi Avropada ABŞ raket hücumundan müdafiə sistemlərinin yerləşdirilməsinə bir alternativ kimi irəli sürmüşdü. ABŞ-ın imtinası halında dünya görməliydi ki, ABŞ bu sistemləri Avropanı İran raketlərindən qorumaq üçün yox, Rusiya ilə mümkün münaqişə ehtimalını nəzərə alaraq (bu halda həmin sistemlər Avropanı yox, yalnız ABŞ-ı qorumağa qadir olacaq) yaradır. Buna görə də ABŞ Rusiyanın təklif etdiyi oyunu bir müddət oynamağa məcbur oldu ki, imtina nümayişkaranə görünməsin. Azərbaycana gəldiksə isə, o, böyük dövlətlərlə bərabərhüquqlu tərəf kimi masaya oturmaqla bu situasiyadan uduşlu çıxdı.
- Gürcüstandakı son proseslərə və növbədənkənar prezident seçkilərində Mixail Saakaşvilinin qələbəsinə münasibətiniz necədir?
- Bizim qəzet Gürcüstandakı prosesləri diqqətlə izləyir və hadisələri maksimum ətraflı işıqlandırmağa çalışır. Nəticələr parlament seçkilərindən sonra tam aydınlaşacaq və böyük ehtimalla bu seçkilərdə müxalifət revanş götürəcək. Əgər prezident Saakaşvili və müxalifətçi parlament birgə işləyə bilsələr, MDB ərazisində kifayət qədər cəlbedici siyasi model ortaya çıxmış olacaq.
- İranın nüvə proqramı ətrafında yaranmış vəziyyətdən çıxış yolunu nədə görürsünüz? Sizcə rəsmi Bakının bu məsələdə mövqeyi necə olmalıdır?
- Təəssüf ki, vəziyyət getdikcə daha dolaşıq hal almaqdadır. Öz avtoritar sistemi, dünyaya və qonşularına müntəzəm dərs verməyi xoşlayan ayətullahları ilə regionda açıq-aşkar hegemonluğa can atan İranın nüvə proqramını məntiqi sonluğa çatdırarsa, qonşuları ilə mübahisələrdə bundan istifadə etməyəcəyini düşünmək sadəlövhlük olardı. Dünya bunu gözəl anlayır. Ona görə də İranın nüvə proqramı nəinki Qərbdə və İsraildə, ərəb dövlətlərində də kəskin narazılıqla qarşılanır. Son aylar ABŞ-ın mövqeyi bir qədər yumşalsa da, bu ölkənin İrana qarşı hərbi əməliyyat keçirməsi ehtimalı kifayət qədər yüksəkdir. ABŞ öz qoşunlarını sonsuzluğa qədər İraqda saxlaya, eyni zamanda İran problemini həll etmədən oradan çıxa bilməz. Belə vəziyyətdə Azərbaycan həm maksimum ehtiyatlı siyasət yeritməli, həm də situasiyanın ən əlverişsiz inkişafına hazırlaşmalıdır. /APA/