Daxili siyasət

Ana səhifə

Daxili siyasət

Bakı Şəhər İcra Hakimiyyəti kütləvi aksiyaların xüsusi ayrılmış yerlərdə keçirilməsində israrlıdır

30 yanvar 2008 14:44 (UTC +04:00)

Bakı Şəhər İcra Hakimiyyəti (BŞİH) bir qrup ictimai təşkilatın kütləvi aksiyalar üçün ayrılmış yerlərlə bağlı göndərdiyi sorğuya cavab verib. “Azərbaycan Naminə” İctimai Forumun prezidenti Eldar Namazovun APA-ya verdiyi məlumata görə, şəhər rəhbərliyi cavab məktubunda bir müddət əvvəl mitinq və küçə yürüşləri üçün şəhərin müxtəlif yerlərində ayrılmış 7 marşrutda hər hansı dəyişiklik etmədiyini bildirib. Məktubda qeyd olunub ki, mitinq planlaşdıran təşkilatlar bu yerlərin birini seçərək BŞİH-yə müraciət etməlidir. Şəhər rəhbərliyi isə öz növbəsində hansı yerdə mitinqin keçirilməsinin məqsədə uyğun olduğunu müəyyənləşdirəndən sonra cavab verəcək: “Bu cavabdan məlum olur ki, hətta şəhər rəhbərliyinin ayırdığı yerlərdə aksiya planlaşdırılacağı təqdirdə belə, icra hakimiyyəti yerlə bağlı qərarı özü verəcək. Lakin bu, absurd yanaşmadır”. E. Namazov yaxın günlərdə Mitinq Komitəsinin növbəti iclasının keçiriləcəyini və atılacaq növbəti addımların müəyyənləşəcəyini bildirib.
Qeyd edək ki, BŞİH 2006-cı ildə mitinqlər üçün 4, küçə yürüşləri üçün isə 3 yer müəyyənləşib. Mitinqlər üçün “Nefçilər” İdman Sağlamlıq Mərkəzinin Bibiheybətdəki stadionu, Rüstəm Rüstəmov küçəsindən Heydər Əliyev adına Bakı Neft Emalı Zavoduna doğru gedən yoldakı meydan, Ukrayna meydanı, “Neftçi” İdman Sağlamlıq Mərkəzinin Tofiq İsmayılov adına stadionu, küçə yürüşləri üçün isə metronun “Neftçilər” stansiyası yanından (Dakar meydanından) başlayaraq Rüstəm Rüstəmov küçəsindən keçməklə Heydər Əliyev adına Bakı Neft Emalı Zavodunun yaxınlığındakı meydana qədər (məsafə 1600 metr), “Həzi Aslanov” metrostansiyasının yanından başlayaraq Məhəmməd Hadi küçəsindən keçməklə Ukrayna meydanınadək (məsafə 1200 metr) və Səttar Bəhlulzadə adına meydandan “Neftçi” İdman-Sağlamlıq Mərkəzinin Tofiq İsmayılov adına stadionunadək (məsafə 1000 metr) olan ərazilər müəyyənləşib. /APA/