Daxili siyasət

Ana səhifə

Daxili siyasət

Müxalifətin prezident seçkilərinə hazırlaşması və seçki aktivliyi niyə hiss olunmur?- SORÄžU

Müxalifətin prezident seçkilərinə hazırlaşması və seçki aktivliyi niyə hiss olunmur?- <font color=#FF0000>SORÄžU</font>

16 aprel 2008 09:45 (UTC +04:00)

Bunu APA-nın “Müxalifətin prezident seçkilərinə hazırlaşması və seçki aktivliyi niyə hiss olunmur?” sualı ilə keçirdiyi sorğusunda iştirak edən Bütöv Azərbaycan Xalq Cəbhəsi Partiyasının sədri Qüdrət Həsənquliyev deyib. Partiya sədri hesab edib ki, hazırda müxalifət düşərgəsində sakitlik olsa da, seçki kifayət qədər ciddi mübarizə şəraitində keçəcək: “Müxalifət namizədlərinin də bu seçkilərdə öz şansları var”.
Ümid Partiyasının sədri İqbal Ağazadə isə ümumilikdə cəmiyyətin bir qədər süst vəziyyətdə olduğunu deyib: “Amma buna baxmayaraq, biz seçkiyə ciddi hazırlaşırıq. Ümumi mənzərənin passiv olması fikrini təbii qəbul edirəm. Çünki indiyə qədər olan seçkilərin yaratdığı məyusluq var. Amma biz süst vəziyyətdə deyilik, seçki kampaniyasına start veriləndə isə daha yaxşı olacaq”.
Böyük Quruluş Partiyasının sədri Fazil Qəzənfəroğlu müxalifətin aktiv olmamasını beynəlxalq təşkilatların bu seçkilərə maraq göstərməməsi ilə əlaqələndirib. Onun sözlərinə görə, Soros Fondu da seçkinin müşahidə olunmasının maliyyələşdirilməsini dayandırıb: “QHT-lərin bir hissəsi müşahidəçiliyi öz imkanları hesabına həyata keçirməkdən geri çəkildilər”. F. Qəzənfəroğlu həm də hesab edib ki, ümumilikdə partiyaların fəaliyyətində kifayət qədər durğunluq var: “Bu məsələlərə bölgənin digər ölkələrində antidemokratik meyllərin güclənməsi, keçirilən seçki proseslərinin də təsiri var. Bir ay ərzində proseslərdə ciddi dəyişiklik olmasa, seçkilərə maraq bu səviyyədə də qalacaq”.
Müsavat Partiyası Mərkəzi İcra Aparatının rəhbəri Arif Hacılı isə müxalifətin passiv olmasının səbəbini mətbuatın və televiziyaların müxalifətə diqqət ayırmaması ilə əlaqələndirib: “Son həftə ərzində Müsavat qərargahında yüzlərlə adamın iştirak etdiyi gənclərlə görüş keçirilib, Zaqatalada 4 rayonun zona müşavirəsi olub. Amma telekanallar bununla bağlı heç bir xəbər yaymayıb”. A. Hacılı müxalifət düşərgəsinin fəallığının da arzu edilən səviyyədə olmadığını qeyd edib.
Azərbaycan Sosial Demokrat Partiyasının həmsədri Araz Əlizadə hesab edir ki, müxalifət seçkinin nəticələrini əvvəlcədən bildiyi üçün fəallığa ehtiyac görmür: “Seçkilərin lideri var, bu, İlham Əliyevdir. İndiyə qədər namizədliyini irəli sürəcəyini deyənlər arasında ona rəqib yoxdur. Buna görə də müxalifət süstdür. Onlar bilirlər ki, artıq məğlubiyyətə gedirlər”.
Vətəndaş və İnkişaf Partiyasının sədri Əli Əliyev müxalifətin passivliyini ölkədə demokratik seçki şəraitinin olmaması ilə əlaqələndirib. Onun fikrincə, həm seçkilərə qatılmaq qərarı verən, həm tərəddüd edən, həm də boykot yolunu tutan qüvvələr Seçki Məcəlləsi ilə bağlı aparılan danışıqların yekununu gözləyir: “Bu müzakirələrin uzanması passivlik yaradır”.
Klassik Xalq Cəbhəsi Partiyasının sədri Mirmahmud Mirəlioğlu ümumilikdə cəmiyyətdə seçki ab-havasının olmadığını deyib. Onun fikrincə, Seçki Məcəlləsinin dəyişməməsi, seçkidə iştirak edəcək qüvvələrin süstlüyü belə bir situasiya yaradıb: “Bu, təkcə müxalifətdən və namizədlərdən asılı ola məsələ deyil”.
Azərbaycan Xalq Cəbhəsi Partiyasının sədr müavini Həsən Kərimov müxalifətin passiv olmasının səbəbini ölkədəki seçkiqabağı mühitlə əlaqələndirib: “Seçki ab-havası olmasa da, “Azadlıq” bloku seçkinin boykot olunması üçün aktiv fəaliyyət göstərəcək”.
Azərbaycan Milli İstiqlal Partiyasının lideri Etibar Məmmədov isə müxalifətin hazırkı durumunu şərh etməkdən imtina edib.
Yeni Azərbaycan Partiyası Siyasi Şurasının üzvü, millət vəkili Siyavuş Novruzovun sözlərinə görə, seçkiyə hazırlıq hər bir partiyanın daimi işi olmalıdır. YAP-ın partiya kimi uzun müddətdir seçki hazırlığı ilə məşğul olduğunu deyən S. Novruzov YAP-ın namizədinin alternativi olmadığından, müxalifətdə passivliyin yarandığını qeyd edib: “Müxalifətdə namizədliyini irəli sürməyi fikirləşənlər artıq anlayırlar ki, bunun mənası yoxdur. Ona görə də ciddi hazırlaşmırlar. Digər tərəfdən, bizim namizədin nüfuzu, əhali arasında apardığı işlər, vədlərini yerinə yetirməsi böyük şanslar yaradıb. Bu baxımdan müxalifətdə qələbə ümidi yoxdur, onlar sadəcə, seçkidə iştirak xatirinə öz namizədliklərini irəli sürəcəklər”.
Mövcud vəziyyəti şərh edən politoloq İlqar Məmmədov isə hesab edir ki, seçkilərlə bağlı siyasi qüvvələr əvvəlcədən seçki strategiyası hazırlamalı və buna uyğun fəaliyyət göstərməlidirlər. Bu təcrübədən bütün dünyada istifadə olunduğunu deyən politoloqun fikrincə, ya Azərbaycan müxalifətinin strategiyası səhvdir, ya da ümumiyyətlə, belə bir strategiya yoxdur. İ. Məmmədov ABŞ-da keçiriləcək növbəti prezident seçkilərinin də Azərbaycandakı seçkilərlə eyni vaxta təsadüf etdiyini bildirib: “Artıq bir ildir ki, Amerikadakı bütün namizədlər şəhər-şəhər, kəndbəkənd gəzirlər, insanlarla görüşürlər, öz fikirlərini seçicilərə çatdırırlar. Bizim namizədlər isə evlərində oturublar. Bu müqayisədən görünür ki, müxalifətin strategiyası yoxdur”.