Daxili siyasət

Ana səhifə

Daxili siyasət

MSK sədri beynəlxalq təşkilatların nümayəndələrini seçki komissiyalarının üzvləri üçün keçirilən treninqlərdə iştiraka dəvət edib

12 noyabr 2014 14:16 (UTC +04:00)

Bakı. Ramiz Mikayıloğlu - APA. Yaxın günlərdə Azərbaycanda məntəqə seçki komissiyalarının üzvlərinə qruplar şəklində treninqlər keçirilməsinə başlanacaq. Treninqlər üçün 1 ay vaxt sərf ediləcək.

APA-nın məlumatına görə, bunu bu gün MSK-nın iclasında MSK sədri Məzahir Pənahov söyləyib.

M.Pənahov treninqlərdə beynəlxalq təşkilatların nümayəndələrinin iştirakını zəruri sayıb: “Mən beynəlxalq təşkilatların nümayəndələrinin bu treninqlərdə iştirak etməsini istəyirəm. Digər tərəfdən, bülletenlərin çap olunması bələdiyyə seçkilərində daha çox vaxt aparır, 1607 növ bülleten çap olunur. Bülletenlərin çapı dekabrın 15-nə qədər başa çatmalıdır. Çünki səsverməyə bir həftə qalmış biz bütün tədbirləri dayandırırıq”.

MSK sədri deyib ki, müşahidəçilər və polis üçün, o cümlədən seçki günü üçün yaddaş kitabçaları hazırlanır. Onun sözlərinə görə, MSK polislər üçün də tədbir keçirəcək: “Mən artıq bununla bağlı Daxili İşlər Nazirliyi ilə danışmışam”.

M.Pənahov qadınları bələdiyyə seçkilərində fəal iştirak etməyə, namizədliklərini irəli sürməyə çağırıb.