Diaspor

Ana səhifə

Diaspor

Britaniya Parlamentinin Lordlar Palatasında Avropa Azərbaycan Cəmiyyətinin rəsmi təqdimatı olub

01 dekabr 2008 13:28 (UTC +04:00)

London - APA. Londonda Britaniya Parlamentinin Lordlar Palatasında Avropa Azərbaycan Cəmiyyətinin (AAC) rəsmi təqdimat mərasimi keçirilib. AAC-dən APA-ya verilən məlumata görə, tədbirdə çıxış edən AAC sədri Tale Heydərov təşkilatın məqsəd və məramlarından, yaranma zərurətindən danışıb. T. Heydərov bildirib ki, AAC 2004-cü ildə Böyük Britaniyada təsis edilmiş London Azərbaycan Cəmiyyətinin əsasında qurulur və fəaliyyət dairəsini genişləndirilməyə doğru istiqamət götürüb. O bu illər ərzində London Azərbaycan Cəmiyyətinin əldə etdiyi təcrübəni, həyata keçirilən layihələrin əhəmiyyətini, eləcə də Azərbaycanın Avropa arenasında tanıdılmasının zəruriliyini önəmli hesab edərək, fəaliyyətlərinin genişləndirmək məqsədilə AAC-nin yaradılmasına qərar verildiyini diqqətə çatdırıb: “Cəmiyyətin başlıca məqsədi zəngin mədəniyyətə, böyük iqtisadi imkanlara malik Azərbaycanı Avropada tanıtmaq, Azərbaycanın beynəlxalq əlaqələrini Avropa KİV-ində, siyasi və mədəni dairələrdə təbliğ etmək, Ermənistan-Azərbaycan, Dağlıq Qarabağ münaqişəsi barədə həqiqətləri beynəlxalq səviyyədə yaymaqla Qərbin bu konfliktə diqqətini artırmaq, Avropada yaşayan və təhsil alan azərbaycanlıları qeyd edilən məqsədlərin həyata keçirilməsində birgə fəaliyyətə cəlb etməkdir.”

AAC-nin fəaliyyət istiqamətlərindən bəhs edən T. Heydərov Azərbaycanın Avropa məkanında tanıdılması məqsədilə təşkilat tərəfindən hazırlanan nəşrlərin əhəmiyyətini önə çəkib. O, cəmiyyətin üç aydan bir ingilis dilində “Visions of Azerbaijan” adlı jurnal nəşr edərək, dünyanın aparıcı kitabxanaları, elm və tədqiqat mərkəzlərində yaydığını, Azərbaycan barədə ingilis və rus dillərində “Azerbaijan: 100 Questions Answered” (Azərbaycan: 100 Sual-cavab) kitabı nəşr etdiyini, yaxın aylarda Britaniyada Dağlıq Qarabağ münaqişəsi barədə xarici müəlliflərin elmi məqalələrindən ibarət kitabın yenidən çap olunacağını deyib. T. Heydərov, həmçinin, AAC tərəfindən aylıq çap olunan biznes və üzvlük bülletenlərinin Avropanın siyasi və işgüzar dairələrində yayıldığını vurğulayıb.

Hazırda cəmiyyətin üzərində işlədiyi layihələrdən bəhs edən AAC sədri britaniyalı rejissor Nik Tiron tərəfindən çəkilən “My Surreal Duty” (Mənim Sürreal Vəzifəm) adlı filmi xüsusi qeyd edib: “Avropa Azərbaycan Cəmiyyətinin təşəbbüsü və Azərbaycan musiqi alətlərinin mahir ifaçısı, amerikalı Cefri Verbokun yaxından iştirakı ilə çəkilən bu sənədli film Ermənistanın təcavüzü nəticəsində Qarabağdan didərgin düşmüş azərbaycanlıların həyatından bəhs edir. Film üzərində işlərin yanvar ayında yekunlaşacağı gözlənilir”.

Tədbirdə çıxış edən İngilis-Azərbaycan Cəmiyyətinin sədri Lord Freyzer Londonda Avropa belə bir cəmiyyətin yaradılmasını Azərbaycanın dünyada tanıdılması baxımından çox əlamətdar hadisə kimi qiymətləndirib. Lord Freyzer cəmiyyətin Dağlıq Qarabağ münaqişəsi barədə həqiqətlərin Avropada yayılması istiqamətində fəaliyyəti müsbət dəyərləndirib, buna çox böyük ehtiyac olduğunu bildirib. Azərbaycanın ərazi bütövlüyünü ən mühüm prinsip kimi qeyd edən Lord Freyzer, problemin ədalətli həllinin tapılmasında diaspor fəaliyyətinin əhəmiyyətini vurğulayıb. O, AAC-nin fəaliyyətinə hər zaman dəstək verməyə, himayədarlıq etməyə hazır olduğunu bildirib.

Azərbaycanın Böyük Britaniyadakı fövqəladə və səlahiyyətli səfiri Fəxrəddin Qurbanov çıxışında noyabr ayında Lordlar Palatasında Azərbaycanla bağlı artıq ikinci tədbirin keçirildiyini diqqətə çatdırıb. Diplomat səfirliyin AAC-nin Birləşmiş Krallıqdakı fəaliyyətinə yaxından dəstək olacağını, artıq səfirliyin cəmiyyətlə birgə tədbir keçirdiyini bildirib.

Onun sözlərinə görə, Qara Qarayevin 90 illik yubileyi münasibətilə təşkil edilmiş konsertdə London Universitetində PhD (doktorluq) təhsili alan azərbaycanlı skripkaçı Sabina Rakçiyeva dahi bəstəkarın əsərlərindən musiqi parçaları ifa edib. Səfir AAC-nin ən vacib layihələrindən biri kimi azərbaycanlı qaçqınlar və muğam barədə çəkilən “My Surreal Duty” sənədli filmində erməni təcavüzü nəticəsində Qarabağdan məcburi köçkün düşmüş azərbaycanlıların acı taleyi, ağır yaşayışı və onların böyük musiqi irsindən bir vəhdət halında bəhs edilməsinin xüsusi maraq doğurduğunu vurğulayıb.

Tədbirin sonunda “My Surreal Duty” sənədli filminin rejissoru Nik Tiron ərsəyə gətirdiyi ekran işindən bir hissəni nümayiş etdirib, tədbir iştirakçılarına AAC-nin Londonda nəşr etdirdiyi “Biznes bülleten”, “Qafqazda və beynəlxalq siyasətdə Azərbaycanın rolu” və “Dağlıq Qarabağ” adlı broşurlar, həmçinin, “Azərbaycan: 100 Sual-cavab” kitabı paylanıb.

Mərasimdə Britaniya Parlamentinin üzvləri, Londonda fəaliyyət göstərən diplomatik korpusun nümayəndələri, beynəlxalq təşkilatların təmsilçiləri, ictimai-siyasi xadimlər, iş adamları və Azərbaycan icmasının fəalları iştirak ediblər.

AAC