Diaspor

Ana səhifə

Diaspor

Kaliforniyada Azərbaycan Amerika gənclərinin III akademik forumu keçirilib

10 dekabr 2008 10:38 (UTC +04:00)

İrvine. Hüsniyyə Həsənova-APA. Kaliforniyada Azərbaycan Amerika gənclərinin III akademik forumu keçirilib. APA-nın ABŞ bürosunun məlumatına görə, İrvine şəhərində baş tutan forumda milli təfəkkür və sosial inkişaf, geosiyasət, diplomatiya və diaspora quruculuğu, enerji məsələləri, iqtisadiyyat və texnologiya, regionda cərəyan edən son hadisələr ətrafında müzakirələr aparılıb.

Azərbaycan Amerika Şurasının (AAŞ) təşkil etdiyi foruma Amerikanın çoxlu sayda professor və tələbə heyəti, yerli şirkətlər və diaspora fəalları qatılıblar. Tədbirdə çıxış edən Tool Shed Qrupun təmsilçisi Ceyson Katz, Yuta Universitetinin professoru Hakan Yavuz, Cənubi Kaliforniya Universitetinin professoru Aylin Çiçek, Kolumbiya Universitetinin təmsilçisi Leyla İsmayılova və AAŞ-nin rəhbəri Cavid Hüseynov əsas diqqəti milli təfəkkür məsələlərinə yönəldiblər.

Kaliforniya Universitetinin professoru Altay Göyüşov Azərbaycan Demokratik Respublikasının 90 illik yubileyi münasibəti ilə ADR-in xarici siyasətini təhlil edib. Forumda çıxış edən Amerika Yəhudi Komitəsinin nümayəndəsi Lisa Qracevski Cənubi Kaliforniyada fərqli dini, mədəni qruplarla dialoq təcrübəsini bölüşüb. Northridge şəhərində yerləşən Kaliforniya Dövlət Universitetinin nümayəndəsi Elman Abdullayev isə diaspora üzvlərinin ABŞ qanunvericilik orqanları ilə işləmək proseduraları barədə danışıb. Daha sonra Amerika Azərbaycanlıları şəbəkəsinin rəhbəri Adil Bağırov ölkənin türk icmasının vahid informasiya mərkəzi Turkica.com saytının təqdimatını keçirib. Adil Bağırov yeni saytın Amerika türklərini maraqlandıran bütün sahələrini əhatə etdiyini deyib.

Forumda avqustda Rusiya ilə Gürcüstan arasında olan baş verən müharibə, onun səbəbləri və fəsadları da diqqət mərkəzində olub. Bu mövzu Vaşinqtonda yerləşən Mərkəzi Asiya və Kafkaz İnstitutunun eksperti Svante Kornel, CACİ-nin nümayəndəsi David Soumbadze, Hakan Yavuz və Azərbaycanın Los-Anceles şəhərindəki baş konsulu Elin Süleymanov danışdılar. Natiqlər məlum hadisələr dövründə ABŞ, Avropa Birliyi, Rusiya və sair iri dövlətlərin məsələyə münasibətini təhlil ediblər. Tədbirin sonunda Kolin Rosienin “Gözəl Bakıda inkişaf” foto sərgisi, bəstəkar Fuad Cavadovun “Bakıya uçarkən” albomundan mahnılar səsləndirilib.