Diaspor

Ana səhifə

Diaspor

Vaqif Məmişov: “Azərbaycanda yaşayış kompleksi inşa etdirməyimə imkan verilməməsi barədə məlumatlar heç bir real fakta söykənmir”

24 dekabr 2008 10:04 (UTC +04:00)

Bakı - APA. “Azərbaycanın bəzi müxalifət mətbuatında Sankt-Peterburqda yaşayan azərbaycanlı iş adamı kimi yeni yaşayış kompleksi inşa etdirməyimə Azərbaycanda imkan verilməməsi ilə bağlı dərc olunan məqalə heç bir real fakta söykənmir. Ucuz sensasiya xatirinə, peşə davranış qaydalarına riayət etmədən və kütləvi informasiya vasitələri haqqında Azərbaycan Respublikasının qanunvericiliyinə zidd olaraq belə bir yazının dövri mətbu nəşrlərdə çap edilməsi jurnalistikanın nüfuzuna ciddi xələl gətirməklə yanaşı, Azərbaycanda azad sahibkarlığın və biznesin inkişafı istiqamətində görülən işlərə kölgə salaraq, cəmiyyətdə çaşqınlıq yaranmasına xidmət edir”. Bu sözləri APA-ya Azərbaycanlıların Sankt-Peterburqdakı Milli-Mədəni Muxtariyyətinin sədri, iş adamı Vaqif Məmişov deyib.

Son illər ərzində Azərbaycanın dövlət quruculuğu sahəsində çox mühüm nailiyyətlər əldə etdiyini, hüquqi-siyasi, sosial-iqtisadi dayaqlarını möhkəmləndirdiyini, iqtisadi potensialına, demokratik inkişaf səviyyəsinə, beynəlxalq aləmdə tutduğu mövqeyə görə regionun lider dövlətinə çevrildiyini qeyd edən V. Məmişov ölkənin irəliyə doğru atdığı hər bir addımın, qazandığı nailiyyətlərin dünyanın müxtəlif ölkələrində yaşayan soydaşlarımız kimi onları da ruhlandırdığını, müstəqil dövlətimizə inamlarını, milli hisslərini və gələcəyə ümidlərini artırdığını, Azərbaycanın milli maraqları ətrafında sıx birləşmələri üçün zəmin yaratdığını vurğulayıb: “Azərbaycan xalqının qələbələrinə, uğurlarına vahid mövqedən və səmimi dəstək vermək iqtidarında olmaqla qətiyyətlə bildirirəm ki, təmsil etdiyimiz təşkilat tərəfindən sahibkarlıq fəaliyyəti ilə məşğul olmaq məqsədilə Azərbaycanda heç bir dövlət orqanına müraciət edilməyib. Lakin gələcəkdə belə bir arzum, niyyətim olarsa, böyük məmnuniyyətlə həmin istəyi həyata keçirər və doğma Vətənimdə möhtərəm prezidentimiz İlham Əliyevin rəhbərliyi ilə aparılan irimiqyaslı yenidənqurma və quruculuq işlərinə öz töhfələrimizi verməkdən qürur duyardım”.

Qeyd edək ki, V. Məmişovun rəhbəri olduğu “Petrovskiy stroitel” şirkəti 2009-cu ildə Sankt-Peterburqda 80 milyon dollar dəyərində yaşayış binası tikəcək. “Petrovskiy stroitel” şirkəti “Konrad” Şirkətlər Qrupuna daxildir.