Diaspor

Diaspor

Xaricdəki diaspor təşkilatları 20 Yanvar faciəsi ilə bağlı tədbirlər keçirəcəklər

14 yanvar 2009 15:18 (UTC +04:00)

Bakı. Kəmalə Quliyeva – APA. 20 yanvar faciəsinin 19-ci ildönümü münasibətilə dünyanın müxtəlif ölkələrində anım mərasimləri keçiriləcək. Diasporla İş üzrə Dövlət Komitəsindən APA-ya verilən məlumata görə, 20 Yanvar şəhidlərinin xatirəsi Rusiya Federasiyasının bir neçə şəhərində anılacaq. Moskvada Azərbaycanın Rusiyadakı səfirliyi ilə Ümumrusiya Azərbaycan Konqresi birlikdə anım tədbiri keçirəcək. Konqresin Sankt-Peterburq, Yekaterinburq, Xabarovsk, Ulan-Ude, Surqut, Ryazan və digər regional təşkilatları 20 Yanvar faciəsinin 19-ci ildönümünə həsr olunmuş müxtəlif tədbirlər təşkil edəcəklər. Kiyev şəhərində Ukrayna Azərbaycanlıları Konreqsinin təşkil edəcəyi dəyirmi masa ilə yanaşı, Səməd Vurğun adına kitabxanada Qanlı Yanvardan bəhs edən sənədli film nümayiş etdiriləcək. Konqresin bu ölkənin Xarkov, Donetsk, Lvov və Dnepropetrovsk bölgələrindəki regional qurumları da anım mərasimləri keçirəcəklər.

Minskdə isə Belarus Azərbaycan İcmaları Konqresi 20 yanvar faciəsi qurbanlarının xatirəsini Azərbaycanın bu ölkədəki səfirliyi ilə birlikdə tədbir keçirərək yad edəcək.
Türkiyə-Azərbaycan Dərnəkləri Federasiyası Ankara, İstanbul və Manisa şəhərlərində da anım tədbiri keçirəcək. İzmirdə isə Qanlı Yanvara həsr edilmiş konfrans təşkil olunacaq.

Misir Ərəb Respublikasının Qahirə şəhərində, Birləşmiş Ərəb Əmirliklərinin Dubay Əmirliyində, Tayland Krallığında, Pakistan İslam Respublikasının paytaxtı İslamabad şəhərində, Avstriyanın Sidney şəhərində, Yeni Zelandiyada, Şimali Kİpr Türk Respublikasında, Özbəkistanda, Qazaxıstanda, Qırğızıstanda, Gürcüstanda fəaliyyət göstərən diaspor təşkilatları da 20 Yanvar faciəsi ilə bağlı tədbirlər keçirəcəklər.

20 yanvar faciəsinin ildönümü Avropa ölkələrində də qeyd ediləcək. Estoniya Azərbaycan Mədəniyyət Mərkəzi, Litva Azərbaycanlıları Cəmiyyəti, .Latviyadakı “Ocaq” Mədəniyyət Mərkəzi, Budapeştdə fəaliyyət göstərən “Macar-Azərbaycan Dostluq Cəmiyyəti”, Rumıniyadakı Azərbaycan Mədəniyyət və Gənclər Asossiasiyası, Kişinyovda Moldova Azərbaycanlıları Konqresi, Praqada “Azər-Çex” Cəmiyyəti ölkəmizin bu ölkələrdəki səfirlikləri ilə birgə Qanlı Yanvar qurbanlarını yad edəcəklər. İsveçdə fəaliyyət göstərən bir neçə Azərbaycan diaspor təşkilatı birlikdə Stokholm və Höteborq şəhərlərində, Böyük Britaniyadakı “Azərbaycan Evi” Londonda, Benilüks Azərbaycanlıları Konqresi (BAK) və “Ana Vətən” Avropa Azərbaycanlı Qadınlar Birliyi Amsterdamda, Finlandiya-Azərbaycan Dostluq Cəmiyyəti Helsinkidə, Danimarkadakı “Vətən” Cəmiyyəti isə Kopenhagendə bu faciənin 19-cu ildönümünü müxtəlif anım tədbirləri ilə qeyd edəcəklər. Strasburqdakı və Parisdəki “Azərbaycan Evi”ndə, Almaniyadakı Azərbaycanlıların Koordinasiya Mərkəzi və Alman-Azərbaycan Cəmiyyəti Berlində, Vahid Azərbaycan Cəmiyyəti Hamburqda və Drezdendə, Kanada Azərbaycan Təşkilatları Assambleyası Toronto və Monreal şəhərlərində, “Hyuston Azərbaycanlıları Cəmiyyəti” Hyustonda 20 Yanvar faciəsini yad edəcək.