Diaspor

Ana səhifə

Diaspor

Çelyabinsk vilayətinin qubernatoru Pyotr Syomin: “Azərbaycanla əlaqələri gələcəkdə daha da inkişaf etdirmək çox vacibdir”

09 fevral 2009 13:31 (UTC +04:00)

Çelyabinsk-APA. Rusiya Çelyabinsk vilayətində fəaliyyət göstərən Azərbaycan diasporunun üzvləri vilayətin qubernatoru Pyotr Suminlə görüşublər. “Ozan” Azərbaycan Mədəniyyəti Mərkəzinin sədri Rəfael Quliyevin APA-ya verdiyi məlumata görə, görüşdə Çelyabinsk vilayəti ilə Azərbaycan Respublikası arasında 2006-cı ildə imzalanmış əməkdaşlıq sazişi çərçivəsində görülən işlərlə bağlı fikir mübadiləsi aparılıb.

Qeyd edək ki, sənədin icra olunmasında mərkəz fəal rol oynayır. Azərbaycan diasporunun gənclər hərəkatı Cənubi Uralın məktəblərində “Dostluq dərsləri” keçirlər. Könüllülər yerli uşaq və yeniyetmələri öz mədəniyyətləri, milli adətlər-ənənələri və Azərbaycan həqiqətləri ilə tanış edirlər. Həmçinin “Ozan” mədəniyyət mərkəzi Azərbaycanla Cənubi Ural arasında əlaqələrin tarixinə həsr olunmuş “Dostluğun ipək yolu. Mədəniyyətlərin dialoqu: Celyabinsk-Bakı” kitabını hazırlayaraq nəşr edib.
Söhbət zamanı Pyotr Sumin bildirib ki, Çelyabinsk vilayəti ilə Azərbaycan arasında qarşılıqlı əlaqələrin möhkəmləndirilməsi və inkişafı hər iki tərəf üçün çox vacibdir: “Dövlət Şurasının sonuncu iclasında Prezident Dmitri Medvedyev MDB ölkələri ilə elmi-texniki, iqtisadi, idman və mədəni əlaqələri gücləndirmək barədə regionların qarşısında məsələ qoyub. Bu, bütün ölkələrin vətəndaşlarına dünya böhranını daha az itki ilə yaşamağa imkan verəcək. Çelyabinsk vilayətinə gəlincə, bizim üçün Azərbaycanla əlaqələri gələcəkdə daha da inkişaf etdirmək çox vacibdir.”

Görüşdə Çelyabinsk vilayətinin qubernatoru Pyotr Sumin Azərbaycan diasporunun qarşılıqlı əməkdaşlığın gücləndirilməsi, xalq diplomatiyasının fəallaşdırılması və vilayət diyarşünaslıq muzeyində Azərbaycan-Çelyabinsk əlaqələrinin tarixinə dair ekspozisiyanın təşkil edilməsi barədə təklifini dəstəkləyib.