Diaspor

Diaspor

Almaniyada ənənəvi “Mayns Festivalı” başlayıb - FOTO

Almaniyada ənənəvi “Mayns Festivalı” başlayıb - <font color=red>FOTO</font>

20 fevral 2009 09:49 (UTC +04:00)

Bakı - APA. Fevralın 20-24-də Almaniyanın Mayns şəhərində illik ənənəvi festival keçirilir. APA-nın məlumatına görə, müxtəlif xalqların, milli azlıqların öz mədəniyyətini nümayiş etdirdiyi bu festivalda həm də dünyadakı əhəmiyyətli siyasi hadisə və problemlər özfəaliyyət səhnəcikləri vasitəsilə təqdim olunur, bu isə festival iştirakçılarının dünyada sülhə tərəfdar olması, müharibə və gərginliklərə qarşı çıxması mənasını verir. Bu tədbirlər müxtəlif mədəniyyətlərin nümayişi ilə yanaşı, fəxri qonaqların-dövlət adamlarının, tanınmış ictimai-siyasi xadimlərin, məşhur incəsənət və mədəniyyət nümayəndələrinin qeyri-rəsmi ünsiyyət məkanı kimi də məşhurdur. Tədbirlərdə Mayns-Azərbaycan Cəmiyyətinin üzvləri də fəal iştirak edəcək, Azərbaycanın milli geyimlərində ölkəmizə aid tanıtım guşəsi sərgiləyəcəklər.

Məlumat üçün bildirək ki, Almaniyada yaşayan bütün xalqların iştirak etdiyi “Mayns Festivalı” möhtəşəmliyi və qədimliyi ilə seçilir. 1837-ci ildən bu günə qədər keçirilən festivalda hər il 1 milyona yaxın insan iştirakı edir. Festival Almaniyanın aparıcı ARD və ZDF TV kanallarında canlı yayımlanır.

Qeyd edək ki, Almaniyanın Mayns şəhər rəhbərliyi bu şəhərdəki Azərbaycan diasporuna xüsusi qayğısı ilə seçilir. Xatırladaq ki, Mayns-Azərbaycan Cəmiyyətinin təşəbbüsü ilə Mayns şəhər bələdiyyəsinin başçısı Yens Boytelin rəhbərlik etdiyi nümayəndə heyəti 2007-ci ilin mayında Azərbaycanda səfərdə olub, müxtəlif görüşlər keçirib, Azərbaycanın bir sıra rayonlarında məskunlaşmış məcburi köçkünlərin vəziyyəti ilə tanış olublar. Nümayəndə heyətini Azərbaycan prezidenti İlham Əliyev də qəbul edib. Səfərin nəticəsi olaraq Y. Boytel 147 minlik Almaniyaya «Azərbaycan haradadır!» sərlövhəli açıq məktubla müraciət edərək, Azərbaycan haqqında bütün təəssüratlarını əks etdirib, Ermənistanın təcavüzkar siyasəti barədə məlumat verib.

Onu da əlavə edək ki, fevral bütün Avropada festivallar ayı kimi tarixə düşüb. Bu festivallar məşhur Braziliya karnavalına bərabər tutulur və festivalların keçirildiyi Avropa şəhərlərinin sakinləri möhtəşəm bayram şənliklərini ilin 5-ci fəsli adlandırırlar. Təkcə Almaniyanın Köln, Düsseldorf və Mayns şəhərlərində keçirilən bu festivallarda tibb işçiləri və polislərindən başqa bütün əhali iştirak edir. Dünya şöhrətli “Berlinale” film festivalı da bu tədbirlər sırasındadır. Dünyanın müxtəlif yerlərindən ən azı 1 milyon turist festivalları izləməyə, teatrlaşdırılmış kostyum və səhnələrlə zəngin ballara, izdihamlı küçə yürüşlərinə baxmağa gəlir. Festivala hazırlıq 3 ay əvvəl, adətən hər il noyabrın 11-də saat 11.11-də başlanır, zirvəsi isə növbəti ilin fevral ayının 23-nə təsadüf edir. Almanların fikrincə, festivalın kulminasiyası qışın son ayına düşməlidir. Almaniya İqtisadiyyatı İnstitutunun əməkdaşları hesablayıblar ki, təkcə yerli sakinlər bu tədbirlərdə 3 milyarddan 5 milyard avroyadək pul xərcləyirlər. Karnavallardan həm də Almaniyanın əmək bazarı xeyir götürür - ilin bu vaxtı ölkədə 40-50 min əlavə iş yeri açılır. Almanlar festival tədbirlərində iştirak üçün 3 milyon kostyum, 900 min süni saç, 500 min maska, 2 milyon şlyapa, 6 milyon qrim üçün dəst və külli miqdarda digər bəzək əşyaları alırlar. Təkcə bu məhsulların satışında əldə olunan ticarət dövriyyəsi 295 milyon avrodur. Maynsda festival zamanı 60 ton şirniyyat paylanır, kiçik bayram hədiyyələrinə 75 min avro, təkcə karnaval ordenlərinə isə 180 min avro xərclənir.