Diaspor

Ana səhifə

Diaspor

İsveçdə, Avstraliyada və Dubayda Xocalı faciəsinin 17-ci ildönümü ilə bağlı anım tədbirləri keçirilib

23 fevral 2009 13:00 (UTC +04:00)

Bakı-APA. Xocalı faciəsinin 17-ci ildönümü ilə bağlı dünyanın bir sıra ölkələrində anım tədbirləri keçirilir.
Diasporla İş üzrə Dövlət Komitəsinin mətbuat xidmətindən APA-ya verilən məlumata görə, fevralın 22-də Stokholm şəhərində Azərbaycan diasporunun fəalları İsveç parlamentinin spikeri Per Westerberqlə görüşüblər. İsveçdəki “Azərbaycan naminə” Cəmiyyətinin sədri Nadir Hollendrandın verdiyi xəbərə görə, görüşdə 1992-ci il fevralın 26-da Ermənistan hərbi birləşmələrinin Xocalı şəhərində törətdiyi dəhşətli soyqırım aktı barədə geniş danışılıb. Spikerə məlumat verilib ki, soyqırım zamanı 613 nəfər öldürülüb, müxtəlif yaşlı 1000 dinc sakin əlil olub, 106 qadın, 63 azyaşlı uşaq, 70 qoca öldürülüb, 8 ailə tamamilə məhv edilib, 1275 nəfər dinc sakin girov götürülüb. Görüşdə İsveç parlamentinin rəhbərinə ermənilərin tarix boyu azərbaycanlılara qarşı törətdiyi qanlı faciələrdən bəhs edən “Erməni terroru” kitabı təqdim edilib. Sidneydə də Xocalı faciəsinin 17-ci ildönümü qeyd edilib. Avstraliya Azərbaycan Türk Dostluq Dərnəyi, Sidney Türk Dayanışma Dərnəyi, Azərbaycan Dərnəyi və “Azərbaycanın Səsi” Radiosunun birgə təşkil etdiyi anım tədbirində bu şəhərdə yaşayan soydaşlarımız, eləcə də türklər, türkmənlər, digər xalqların diaspor təşkilatlarının rəhbərləri, millət vəkilləri və KİV nümayəndələri, həmçinin bu ölkədə təhsil alan azərbaycanlı tələbələr iştirak ediblər. Avstraliya Azərbaycan Türk Dostluq Dərnəyinin sədri İmaməddin Qasımov qonaqlara soyqırımla bağlı məlumat verib.
Birləşmiş Ərəb Əmirliklərinin Dubay Əmirliyində fəaliyyət göstərən Azərbaycan Cəmiyyəti Xocalı soyqırımının 17-ci ildönümünə həsr olunmuş anım tədbiri keçirib. Soydaşlarımızla yanaşı türk, fransız, rus icmalarının, iraq türkmənlərinin və ərəblərin də qatıldığı tədbirdə 17 il əvvəl ermənilərin törətdiyi dəhşətli soyqırım haqqında məlumat verilib. Cəmiyyətin sədri Samir İmanov öz çıxışında bildirib ki, 1992-ci il fevralın 26-da Ermənistan hərbi birləşmələri Xocalı şəhərində soyqırım aktı həyata keçirib. Cəmiyyət sədri mərasimə toplaşanlara məlumat verib ki, indi Azərbaycan hökuməti Xocalı soyqırımı ilə bağlı Ermənistan dövlətinin Beynəlxalq Cinayət Məhkəməsinə (Haaqa məhkəməsi) verilməsi yollarını araşdırır.
Tədbirdə Xocalı faciəsini əks etdirən fotoşəkillər nümayiş etdirilib, bu qanlı hadisədən bəhs edən kitablar sərgilənib, onlardan bəziləri qonaqlara paylanıb. Heydər Əliyev Fondunun hazırladığı soyqırımdan bəhs edən film də tədbir iştirakçılarına təqdim olunub.