Diaspor

Ana səhifə

Diaspor

Xocalı faciəsinin ildönümü Qazaxıstanda və Gürcüstanda qeyd olunub

24 fevral 2009 07:29 (UTC +04:00)

Astana, Tiflis - Ləman Ağayeva, Nizami Məmmədzadə-APA. Xocalı faciəsinin 17-ci ildönümü ilə bağlı Qazaxıstanda və Gürcüstanda tədbirlər keçirilib. APA-nın Qazaxıstan müxbirinin məlumatına görə, bu ölkədə yaşayan azərbaycanlıların təşkilatçılığı ilə 14 vilayətdə keçirilən anım tədbirlərinə digər millətlərin nümayəndələri qatılıblar.
Qazaxıstan Azərbaycanlıları Mədəni Mərkəzləri İttifaqının, Astana şəhər Xəzər Cəmiyyətinin təşkil etdiyi anım günündə Azərbaycanın və Türkiyə Respublikasının səfirliklərinin, Ukrayna, alman, koreya, qırğız, türkmən diasporlarının nümayəndələri, Astana şəhərinin ziyalıları, Qazaxıstan-Azərbaycan Dostluq Assosiasiyasının üzvləri də iştirak ediblər. Tədbir iştirakçılarına Heydər Əliyev Fondu tərəfindən hazırlanmış Xocalı soyqırımı haqqında filmlər və kitablar, bukletlər təqdim edilib.
Azərbaycanın Qazaxıstandakı səfiri Lətif Qəndilov ermənilərin azərbaycanlılara və türklərə qarşı zaman-zaman törətdikləri vəhşiliklərdən danışıb.
Qazaxıstan Azərbaycanlıları Mədəni Mərkəzləri İttifaqının prezidenti Vidadi Salahov 26 fevral Xocalı faciəsinin 17-ci ildönümünün Qazaxıstanın bütün region və vilayətlərində, bazar günü məktəblərində də qeyd olunduğunu bildirib.
APA-nın Gürcüstan müxbirinin məlumatına görə, dünən Tiflisdəki Mirzə Fətəli Axundov adına Muzeydə Xocalı faciəsinin 17-ci ildönümünə həsr edilmiş tədbir keçirilib. Tədbirdə 73 saylı Azərbaycan orta məktəbinin yuxarı sinif şagirdləri, müəllimlər və qonaqlar iştirak edib. Çıxış edənlər faciənin Azərbaycan xalqının tarixinə soyqırımı kimi yazıldığını və bu faciəni yalnız ildönümlərində deyil, il ərzində qeyd etməyin vacib olduğunu bildiriblər.