Diaspor

Ana səhifə

Diaspor

Xocalı soyqırımının ildönümü ilə əlaqədar Ermənistanın Belçikadakı səfirliyi qarşısında etiraz aksiyası keçirilib - FOTOSESSİYA

Xocalı soyqırımının ildönümü ilə əlaqədar Ermənistanın Belçikadakı səfirliyi qarşısında etiraz aksiyası keçirilib - <font color=red>FOTOSESSİYA</font>

26 fevral 2009 13:19 (UTC +04:00)

Brüssel-APA. Bu gün Belçikadakı Azərbaycan və türk diaspora təşkilatları Xocalı soyqırımının 17-ci ildönümünə həsr edilmiş tədbirlər keçiriblər. Bu barədə APA-ya Azərbaycanın Belçikadakı səfirliyinin mətbuat xidmətindən məlumat verilib. Avropa parlamentinin binası qarşısında əhalinin gediş-gəlişinin sıx olduğu Şuman meydanında çadır qurulub. Çadırda Xocalı faciəsinə həsr edilmiş sərgi və film nümayiş etdirilib. Sərgiyə təşrif buyuranlar İslam Konfransı Təşkilatının Gənclər Forumunun Mədəniyyətlərarası dialoq üzrə Baş koordinatoru Leyla Əliyevanın təşəbbüsü ilə irəli sürülmüş “Xocalıya ədalət” beynəlxalq kampaniyasına qoşulub və müvafiq sənədə imza atıblar.

Sonra soydaşlarımız Ermənistan səfirliyinin önündə aksiya keçirərək Azərbaycan torpaqlarının işğal edilməsinə etiraz edib, torpaqların azad edilməsini tələb edib və Ermənistan hökumətinə ünvanlanmış etiraz məktubunu Səfirliyin əməkdaşına təqdim ediblər. Daha sonra Avropa Parlamentinə doğru yürüş başlayıb. Şuman meydanında toplaşmış soydaşlarımız Avropa institutlarını Azərbaycan ərazilərinin işğalına göz yummamağa, Xocalı soyqırımını tanımağa və Ermənistanı qınamağa çağırıblar. Sonda Avropa İttifaqının hazırkı sədri Çex Respublikasının baş naziri Mirek Topolanekə, Avropa Komissiyasının sədri Joze Manuel Barrozoya və Avropa Parlamentinin sədri Hans-Gert Potteribgə ünvanlanmış etiraz məktubları qurumun rəsmilərinə təqdim edilib. Yürüş iştirakçıları müvafiq sənədə imza atmaqla “Xocalıya ədalət” beynəlxalq kampaniyasına dəstək veriblər. Brüsseldə keçirilmiş bu aksiyalara Hollandiya və Almaniyadan gəlmiş Azərbaycan və türk icmalarının nümayəndələri də qatılıblar.

Həmin gün Səfirlik tərəfindən hazırlanmış Xocalı soyqırımı ilə bağlı mətbuat açıqlaması Belçikanın rəsmi qurumlarına və kütləvi informasiya vasitələrinə, xarici ölkələrin Belçikadakı səfirliklərinə, Avropa İttifaqı və NATO yanındakı diplomatik nümayəndəliklərinə göndərilib.

Bu aksiyaların davamı olaraq Heydər Əliyev Fondunun dəstəyi ilə martın 3-də Avropa Parlamentinin binasında Avropa Parlamentinin üzvü xanım Jizela Kalenbaxın himayəsi altında Xocalı soyqırımına həsr edilmiş konfrans keçiriləcək. Konfransda faciə ilə bağlı geniş məlumat veriləcək, sərgi və film nümayiş etdiriləcək, canlı olaraq tar və kaman musiqisi səsləndiriləcək və nəhayət İslam Konfransı Təşkilatının Gənclər Forumunun Mədəniyyətlərarası dialoq üzrə Baş koordinatoru Leyla xanım Əliyevanın təşəbbüsü ilə irəli sürülmüş “Xocalıya ədalət” beynəlxalq kampaniyasının internet səhifəsinin təqdimatı keçiriləcək.