Diaspor

Diaspor

Benilüks Azərbaycanlıları Konqresinin ll qurultayı keçirilib

10 mart 2009 08:02 (UTC +04:00)

Bakı-APA. Niderland Krallığının paytaxtı Amsterdam şəhərində Benilüks Azərbaycanlıları Konqresinin (BAK) ll qurultayı keçirilib. Azərbaycanın Diasporla İş üzrə Dövlət Komitəsinin mətbuat xidmətindən APA-ya verilən məlumata görə, qurultay Azərbaycan Dövlət himninin səsləndirilməsi ilə başlanıb, konqresin ikiillik fəaliyyətindən bəhs edən film nümayiş etdirilib. Konqresin sədri Sahil Qasımov rəhbərlik etdiyi qurumun fəaliyyəti ilə bağlı hesabat məruzəsi ilə çıxış edib. O, iki il əvvəl bu konqres yaradılarkən Benilüks məkanında- Belçika, Niderland və Lüksemburqda yaşayan Azərbaycan diaspor və təşkilatlarını birləşdirməyə çalışdıqlarını bildirib, həmin dövrdə bütün təşkilatları birləşdirmək mümkün olmasa da, 15 qurumun konqres ətrafında birləşdirildiyini, beləliklə Benilüks Azərbaycanlıları Konqresinin yarandığını söyləyib.
Azərbaycanın Niderland Krallığındakı səfiri Fuad İsgəndərov ölkədə fəaliyyət göstərən diaspor təşkilatlarının Azərbaycanın tanınması istiqamətində mühüm işlər gördüyünü, bu sahədə BAK-ın fəaliyyətini yüksək qiymətləndirib, konqresin ikitərəfli əlaqələrin yaranması və inkişaf etdirilməsi istiqamətində əhəmiyyətli işlər gördüyünü bildirib.
Azərbaycan-Lüksemburq parlamentlərarası dostluq qrupunun sədri, Milli Məclisin deputatı Elmira Axundova xarici ölkələrdə yaşayan azərbaycanlıları öz doğma Vətənləri ətrafında sıx birləşdirmək məqsədi ilə Heydər Əliyevin diasporun yaradılmasına xüsusi önəm verməsindən danışıb.
Azərbaycan-Niderland Parlamentlərarası işçi qrupunun rəhbəri, Milli Məclisin deputatı Adil Əliyev isə çıxışında bildirib ki, BAK-ın balaca soydaşlarımızın soy-köklərindən uzaq düşməməsi, ana dillərini unutmamaları üçün Amsterdam və Rotterdamda həftə sonu məktəblərini açması diqqətəlayiq haldır. Diapor ilə İş üzrə Dövlət Komitəsi Qərbi Avropa şöbəsinin müdiri İlham Məmmədov çıxışında BAK-ın Azərbaycanı Benilüks ölkələrində tanıtmaq istiqamətindəki fəaliyyətini yüksək qiymətləndirib. Ukrayna, Qazaxıstan və Gürcüstanın Niderland Krallığındakı səfirləri, Almaniya, Fransa, Rumıniya və İngiltərədəki, habelə Benilüks məkanındakı Azərbaycan və türk icmalarının təmsilçiləri, Niderlandda yaşayan soydaşlarımız qurultayda iştirak ediblər.
Sonda qurultayın qətnaməsi qəbul edib. Sahil Qasımov rəhbərlik etdiyi quruma əməli kömək göstərdiklərinə görə BAK-ın mükafatlandırdığı şəxsləri elan edib.
Qurultayda səsvermə yolu ilə 12 nəfərdən ibarət BAK idarə heyətinin üzvləri seçilib. İdarə heyətinin ilk iclasında isə Elsevər Məmmədov sədr, Sahil Qasımov isə fəxri sədr seçiliblər.