Diaspor

Diaspor

Amerikadakı Azərbaycan diaspor təşkilatları ermənilərin Azərbaycan və Türkiyəyə qarşı yönələn irqi təhqirlərinə etiraz bəyanatı yayıblar

14 mart 2009 07:25 (UTC +04:00)

Los Angeles. Zaur Həsənov-APA. Bu gün Amerika-Azərbaycan Şurası (AAŞ), Amerika-Azərbaycan Cəmiyyəti və Kaliforniyanın Türk icması birgə bəyanatla çıxış ediblər. APA-nın ABŞ bürosunun xəbərinə görə, bəyanat ermənilərin “Enerji Təhlükəsizliyinin Geosiyasəti” adlı konfransda səsləndirdikləri irqi ittihamlara etiraz sənədidir.

Qeyd edək ki, bu il martın 11-də Kaliforniya Dövlət Universitetində (Northridge şəhəri) “Enerji Təhlükəsizliyinin Geosiyasəti” adlı konfransda çıxışı zamanı Amerikadakı yerli erməni tələbələr Azərbaycan və Türk xalqlarına, həmçinin Azərbaycanın Los-Ancelsdəki baş konsulu Elin Süleymanovun ünvanına konfransın mövzusuna uyğun olmayan mövzularla bağlı irqi və etnik ittihamlar səsləndiriblər.

Bu ittihamlara etiraz olaraq yayılan bəyanatda hər bir amerikalının öz fikrini azad ifadə etmək hüququna hörmətlə yanaşıldığı vurğulanıb: “ Eyni zamanda etnik təhqirlərə və irqi çıxışlara 21-ci əsr Amerikasında hələ də rast gəlməyin mümkünlüyü bu ölkənin akademik mühiti üçün qəbul olunmazıdır. Erməni əsilli tələbələr tədbirdə əsaslı və konstruktiv dialoq qurmaq əvəzinə, Azərbaycanın dağıdılması, yerli əhalinin öz torpaqlarından kütləvi deportasiya və dünyanın başqa hissəsinə köçürülməsi barədə bəyanatlar səsləndiriblər. Bu bəyanatlar İsrailin dağıdılması və yəhudilərin başqa ərazilərə köçürülməsi haqqında bəşər düşmənlərinin əvvəllər etdikləri bəyanatlara oxşayırdı. Ən çox təsir edən məqam isə onunla bağlıdır ki, baş konsul Elin Süleymanovun çıxışı zamanı erməni əsilli tələbələr özlərini “ali Erməni Ariy” irqinin nümayəndələri, Azərbaycanları isə “türk xalqının qalığı” kimi adlandırıblar.

Amerikada yaşayan azərbaycanlılar üçün nə qədər təhqiramiz olsa da, biz inanırıq ki, qəti irqi bəyanatlar və türkifobiya şuarları bütün Amerikadakı ermənilər tərəfindən dəstəklənir. Doktor Martin Lüter Kinqin məşhur “mən arzu edirəm ki, bir gün mənim dörd uşağım dərilərinin rənginə görə deyil, bacarıqlarına görə qiymətləndiriləcəklər” bəyanatlarını yada salaraq qeyd etməliyik ki, 21-ci əsrdə Amerika irqi ayrı-seçkiliyi və sosial dözümsüzlüyü yox etmək üçün çox məşəqqətli yol keçib. Ümid edirik ki, Amerikadakı ermənilər və onların dostları həmin dəyərləri bölüşür və konkret etnosa qarşı yönələn şovinizmin, irqi ayrı-seçkiliyin nə dərəcədə Ermənistana, Cənubi Qafqazda əməkdaşlıq və sülhə, bütün bəşərə ziyan vurduğunu anlayır”.