Diaspor

Diaspor

Almaniyada Avropa Azərbaycanlıları Konqresinin III qurultayı keçirilib

15 aprel 2009 10:16 (UTC +04:00)

Bakı-APA. Almaniyanın Frankfurt şəhərində Avropa Azərbaycanlıları Konqresinin (AAK) III qurultayı keçirilib. Diasporla İş üzrə Dövlət Komitəsinin mətbuat xidmətindən APA-ya verilən məlumata görə, qurultaya Avropanın 25 ölkəsindən 79 nümayəndə və qonaq qatılıb. Tədbirdə Diasporla İş üzrə Dövlət Komitəsinin sədri Nazim İbrahimov, Azərbaycanın Almaniyadakı səfiri Pərviz Şahbazov, Almaniya Bundestaqının üzvü Haqqı Kəskin, DAK həmsədri Sabir Rüstəmxanlı, AAK-ın üzvü olan diaspor təşkilatlarının rəhbərləri və nümayəndələri iştirak edirlər. Qurultayı açan AAK prezidenti Natiq Ağamirov deyib ki, ötən dövr ərzində AAK öz imkanları daxilində Avropada güclü Azərbaycan diasporunun formalaşdırılmasına səy göstərib, soydaşlarımızın təşkilatlanması istiqamətində tədbirlər görməyə çalışıb. Nazim İbrahimov qurultay iştirakçılarına Azərbaycan prezidenti İlham Əliyevin salamlarını çatdırıb. Komitə sədri AAK-ın fəaliyyətini yüksək qiymətləndirib.
Səfir Pərviz Şahbazov isə bildirib ki, son vaxtlarda Almaniyada Azərbaycan diaspor təşkilatlarının xüsusi fəallığı müşahidə olunur. Qurultayın qətnaməsi qəbul olunub. Qətnamədə konqresin növbəti qurultaya qədər fəaliyyət proqramının qəbul olunması qeyd edilib. Qətnaməyə uyğun olaraq AAK-ın strukturunda dəyişiklik edilib. Qurumun iki birinci vitse-prezident və beş vitse-prezident vəzifələri təsis edilib. Türkiyə-Azərbaycan Dərnəkləri Federasiyasının sədri Bilal Dündar və Benilüks Azərbaycanılıarı Konqresinin fəxri prezidenti Sahil Qasımov I vitse-prezidentlər, Belarus Azərbaycan İcmaları Konqresinin sədri Natiq Bağırov, Estoniya Parlamentinin üzvü Eldar Əfəndiyev, Ukrayna Azərbaycanlıları Konqresinin sədri Akif Gülməmmədov, Srtasburq Azərbaycan Evinin rəhbəri Mustafa Alınca, Almaniyadakı Azərbaycanlılarının Koordinasiya Mərkəzinin rəhbəri Samirə Patzer-İsmayılova isə vitse-prezidentlər seçildilər. Sonra 27 nəfərdən ibarət İcraiyyə Komitəsinin tərkibi təsdiqlənib.
Mayns-Azərbaycan Cəmiyyətinin sədri, Dünya Azərbaycanlıları Əlaqələndirmə Şurasının İdarə Heyəti sədrinin müavini, əvvəlki tərkibdə AAK-ın I vitse-prezidenti olan Başar Kömür qurultayda AAK-ın prezidenti seçilib.
Qeyd edək ki, qətnaməyə görə, Avropa Azərbaycanlıları Konqresinin IV Qurultayı 2011-ci ildə Şərqi Avropa ölkələrinin birində keçiriləcək.
AAK-ın yeni seçilmiş vitse-prezidentlərindən biri Samirə Patzer-İsmayılova isə qurultay iştirakçılarının Azərbaycan Prezidentinə müraciəti oxuyub. Müraciətdə deyilir ki, fəaliyyət göstərdiyi beş il ərzində AAK Avropada yaşayan azərbaycanlıların təşkilatlanması, hüquq və azadlıqlarının müdafiəsi, milli-mənəvi dəyərlərimizin qorunması, zəngin mədəni irsimizin təbliği sahəsində öz imkanları daxilində bir sıra tədbirlər həyata keçirməyə müvəffəq olub. Sonda isə Gürcüstandan olan soydaşımız Fazil Həsənov AAK-ın III qurultayının iştirakçılarının bəyanatını səsləndirib. Bəyanatda Türkiyə-Ermənistan sərhədlərinin açılması ilə bağlı yayılan məlumatlara da toxunulub: “Biz – Avropa Azərbaycanlıları Konqresinin III qurultayının iştirakçıları Türkiyə hökumətinə müraciət edərək Ermənistanla sərhədlərin açılması barədə kütləvi informasiya vasitələrində yayılmış məlumatlara aydınlıq gətirməyə çağırırıq. Biz bu məsələdə xalqlarımızın mövqeyinin tamamilə üst-üstə düşdüyünə inanaraq, Türkiyə türklərinə üz tutur və bu cür yanlış qərarların qəbul edilməməsi üçün siyasi dairələrə öz qəti və kəskin etirazını bildirməyə dəvət edirik”.