Diaspor

Ana səhifə

Diaspor

Ankarada Türkiyə universitetlərini bu il bitirən azərbaycanlı məzunlarla görüş keçirilib

29 may 2009 09:55 (UTC +04:00)

Bakı-APA. Mayın 28-də Ankarada Azərbaycanın Türkiyədəki Səfirliyində Türkiyə universitetlərini bu il bitirən azərbaycanlı məzunlarla görüş keçirilib.
Bu barədə APA-ya Diasporla İş üzrə Dövlət Komitəsinin mətbuat xidmətindən bildirilib. Tədbirə bu ölkənin bütün şəhərlərindəki ali məktəblərində təhsilini başa vuran gənclər qatılıblar. Görüşdə Azərbaycan Respublikası Diasporla İş üzrə Dövlət Komitəsi sədrinin birinci müavini Valeh Haciyev, Azərbaycanın Türkiyədəki səfiri Zakir Həşimov, Türkiyə Təhsil Nazirliyinin nümayəndələri Türkiyə-Azərbaycan Dərnəkləri Federasiyasının sədri Bilal Dündar və digər şəxslər iştirak edib. Görüş məzunlarla vida mərasimi xarakteri daşımaqla yanaşı, həm də Türkiyədə təhsilini, elmi fəaliyyətini davam etdirəcək və ya orada qalıb işləyəcək soydaşlarımızın diaspor işində fəallığının artırılmasına dair fikir mübadiləsi məqsədilə keçirilib. Bu il Türkiyə Universitetlərini bitirən azərbaycanlı məzunların təhsil aldıqları müddətdə bu ölkədəki diasporumuzun ən aktiv hissəsini təşkil etdiklərini nəzərə alaraq, bundan sonra da onların Turkiyədəki Azərbaycan diasporunun daha da güclənməsinə səy göstərmələri, bu məqsədlə əllərindən gələni əsirgəməmələri görüşün əsas müzakirə mövzusu olub.
Görüşün rəsmi hissəsindən sonra tədbir Azərbaycanın xalq artisti Brilliant Dadaşovanın ifasında konsert proqramı və ziyafətlə davam edib.