Diaspor

Ana səhifə

Diaspor

Sabina Rakçeyeva Şimali Kaliforniyada konsert proqramı ilə çıxış edib - FOTOSESSİYA

Sabina Rakçeyeva Şimali Kaliforniyada konsert proqramı ilə çıxış edib - <font color=red>FOTOSESSİYA</font>

03 iyun 2009 07:45 (UTC +04:00)

Los-Anceles. Zaur Həsənov-APA. İyunun 1-də Kaliforniyada səfərdə olan azərbaycanlı skripkaçı Səbinə Rakçeyeva və rəhbərlik etdiyi qrup Azərbaycan Demokratik Respublikasının 91-ci ildönümü ilə bağlı Monterrey şəhərində konsert verib. APA-nın ABŞ bürosunun məlumatına görə, konsert Azərbaycanın Los-Ancelesdə baş konsulluğun dəstəyi və həmin şəhərdə yerləşən Dəniz Donanması Mərkəzinin azərbaycanlı tələbəsi və eyni zamanda Azərbaycan Prezidenti yanında Strateji Araşdırmalar Mərkəzinin əməkdaşı Rəşad Kərimov və “Azərtac” Dövlət Agentliyinin ABŞ-dakı nümayəndəsi Şəfəq Akifqızının səyləri nəticəsində baş tutub.

Toplantıda çıxış edən Şəfəq Akifqızı mayın 28-i tarixinin Azərbaycan xalqı üçün mahiyyəti və 91 il əvvəl qurulan müsəlman dünyasının ilk demokratik cümhuriyyətinin qlobal demokratiyaya verdiyi tövhələrdən danışıb. O, bildirib ki, son illər Amerika azərbaycanlıları Birləşmiş Ştatlarda daha səmərəli şəkildə təşkilatlanaraq ABŞ ictimaiyyətində nüfuza çevrilməkdədir. O, Amerikanın çoxsaylı ştatlarının və şəhərlərinin 28 may tarixini “Azərbaycan Milli Günü” elan etməsini və bu münasibətlə Azərbaycan mənşəli vətəndaşlara təbrik göndərməsini buna misal göstərib.

Daha sonra toplantıda Kaliforniya qubernatoru Arnold Şvartseneqqerin Azərbaycanın Respublika Günü münasibəti ilə göndərdiyi bəyannamə oxunulub. Qubertanor Şvartseneqqer təbrik mesajında Amerika azərbaycanlılarının “Qızıl ştata” verdiyi tövhələri xüsusi qeyd edib.

Tədbirdə çıxış edən Monterrey şəhəri merinin müavini Nensi Selfric Şəhər Şurasının 28 may tarixini “Azərbaycan Günü” elan etməsi barədə qərarını yerli azərbaycanlı icması üzvlərinə təqdim edib. Bu münasibətlə qəbul olunan qərarda bildirilir ki, 1918-ci ildə qurulan Azərbaycan Respublikası cinsi, dini və təbəqəsindən asılı olmayaraq bütün vətəndaşlarına eyni hüquqlar verən ilk dövlətlərdən biri idi. Bəyannamədə Monterrey şəhərində yerləşən nüfuzlu ali təhsil ocaqları, o cümlədən Monterrey Beynəlxalq Araşdırmalar İnstitutu, Pentaqonun Dil Təkmilləşdirmə İnstitutu, eləcə də ABŞ Hərbi Dəniz Qüvvələrinin Ali Məktəbi ilə Azərbaycan Respublikası arasında qurulan işgüzar münasibətlər yüksək qiymətləndirilib. Qeyd edək ki, Monterrey Xarici Əlaqələr İnstitutu Azərbaycan Xarici İşlər Nazirliyinin Diplomatik Akademiyası ilə ingilis dili üzrə hazırlıq kurslarının təşkili ilə bağlı əməkdaşlıq edir.

Azərbaycanın Los-Anceles şəhərindəki baş konsulu Elin Süleymanov isə çıxışında vurğulayıb ki, 1991-ci ildə müstəqilliyini bərpa edən Azərbaycan Respublikası ADR-in tarixi təcrübəsindən bəhrələnməkdədir. ABŞ-la Azərbaycan arasında strateji tərəfdaşlıq münasibətlərinin mövcudluğunu diqqətə çatdıran diplomat Amerikada fəaliyyət göstərən Azərbaycan diaspor təşkilatlarının artan fəallığından məmnunluq ifadə edib. Baş konsul Monterrey Şəhər Şurasına üzərində Qız qalasının əksi olan Azərbaycan xalçasını hədiyyə edib.

Bayram toplantısı gənc skripkaçı Sabina Rakçeyevanı rəhbərliyi altında klassik musiqi qrupunun konserti ilə davam edib. Şimali Kaliforniyanın musiqisevərlərinə Qərb klassik musiqisi ilə yanaşı Azərbaycan milli folklorundan “Sarı gəlin” və “Laçın” parçalarının improvizasiyası təqdim edilib.