Diaspor

Ana səhifə

Diaspor

Azərbaycan-Amerika Şurası ABŞ-dakı erməni təşkilatlarının bəyanatlarını qeyri-produktiv adlandırıb

24 iyul 2009 13:37 (UTC +04:00)

Bakı. Viktoriya Dementyeva-APA. Azərbaycan-Amerika Şurası Dağlıq Qarabağ münaqişəsinin sülh yolu ilə nizamlanması prosesinə dair bəyanatla çıxış edib. APA-nın məlumatına görə, bəyanatda bildirilir ki, Azərbaycan və Ermənistan prezidentləri arasında iyulun 17-18-də Moskvada keçirilən görüşlə əlaqədar Amerikadakı erməni təşkilatlarından ikisi bəyanatla çıxış edib və danışıqlar prosesində əldə olunan irəliləyişlərlə bağlı narahatlıqlarını ifadə ediblər: “Amerika Erməni Milli Komitəsinin sədri Kennet Xaçikyanın ABŞ prezidenti Barak Obamaya göndərdiyi 14 iyul tarixli məktubda bildirilir ki, “ermənilər ATƏT-in Minsk Qrupu həmsədrlərinin təhlükəli və birtərəfli güzəştlərə getmək üçün Ermənistana edilən ifrat və əsassız təzyiqlərdən narahatdırlar”. Komitə sədri həmçinin danışıqlar prosesinə üzdəniraq “Dağlıq Qarabağ Respublikası”nın cəlb olunmasını vacib sayıb. İyulun 22-də isə Amerika Erməni Assambleyası bəyanat verərək Dağlıq Qarabağın danışıqlar prosesinə cəlb olunmasına çağırıb və bu təklifini Assambleyanın Dağlıq Qarabağda yaşayan insanların fundamental hüquqlarını dəstəkləməsi ilə əsaslandırıb”.
Bəyanatda bildirilir ki, hələ 2008-ci ilin yanvarında Amerika-Ermənistan münasibətlərinin əhəmiyyətindən danışan o zamankı prezidentliyə namizəd Barak Obama Dağlıq Qarabağ münaqişəsinin şəffaf, uzunmüddətli, tərəflər üçün məqbul sayılan demokratiya və öz müqəddəratını təyinetmə prinsipləri əsasında həlli üzərində çalışacağını bildirib: “Amerika azərbaycanlıları kimi biz prezident Obamanın bu sözləri ilə razılaşa bilmərik. Amerikadakı erməni təşkilatları “Dağlıq Qarabağ xalqının əsas hüquqları”na dəstək verdiklərini bəyan etməklə şüurlu şəkildə orada etnik azərbaycanlı icmasının varlığını istisna etmiş olurlar. Hansı ki münaqişənin başlandığı 1988-ci ilə qədər Dağlıq Qarabağın əhalisinin üçdə bir hissəsini, ona bitikiş olan və Ermənistan tərəfindən bufer zona kimi işğal olunan digər yeddi rayonun isə əhalisinin 99 faizini azərbaycanlılar təşkil edib. 1991-1994-cü illərdə 800 minə yaxın azərbaycanlı Ermənistan Silahlı Qüvvələri tərəfindən etnik təmizlənməyə məruz qalıb və qeyd olunan rayonları məcburi şəkildə tərk ediblər. Buna görə də mübahisəli ərazidə yalnız bir etnik qrupun maraqlarının önə çıxarılması Amerika dəyərləri ilə ziddiyyət təşkil edir. Öz müqəddəratını təyinetmə etnik təmizləməyə və varlığını inkar olunmasına haqq qazandırmaq üçün beynəlxalq səviyyədə tanınmış termin deyil”.
Azərbaycan-Amerika Şurası bu səbəblərdən erməni komitələrinin qondarma “Dağlıq Qarabağ Respublikası”nı bərabərhüquqlu tərəfli kimi danışıqlar prosesinə cəlb etmək təkliflərini qeyri-produktiv adlandırıb: “Əgər bu ərazilərdə əhalinin üçdə bir hissəsi səsvermə hüququndan məhrum olubsa, orada keçirilən heç bir seçki qanuni sayıla bilməz”.