Diaspor

Ana səhifə

Diaspor

Əbülfəz Şeydabəyov: “Şimali Kiprdəki Azərbaycan cəmiyyəti ölkəmizin tanıdılması üçün mümkün olan addımları atır”

09 oktyabr 2009 16:07 (UTC +04:00)

Bakı. Elnur Məmmədli-APA. Şimali Kiprdə Azərbaycan günləri davam edir. Azərbaycanın Kiprdəki fəxri konsulunun müavini Əbülfəz Şeydabəyov APA-ya açıqlamasında bildirib ki, Azərbaycan günləri ilə bağlı tədbirlər ölkənin 6 universitetində təhsil alan 200 azərbaycanlı tələbə, orada yaşayan azərbaycanlı iş adamları və müəllimlər tərəfindən keçirilir. Tədbirlərdə Azərbaycandan sənət adamları, millət vəkilləri də iştirak edir. Ə. Şeydabəyov bu tədbirlərin davam etdiriləcəyini deyib: “Hər il olduğu kimi, növbəti ildə də Azərbaycan İncəsənət Universitetinin folklor ansamblının Kiprdə çıxışları təşkil olunacaq”.

Ə. Şeydabəyov bildirib ki, Şimali Kiprdə Azərbaycan Kültür Dərnəyi və həmçinin fəxri konsulluğu fəaliyyət göstərir: “Şimali Kiprdəki Azərbaycan cəmiyyəti Azərbaycanın tanıdılması üçün mümkün olan addımları atır. Hər il bu ölkədə 28 May - Respublika Günü qeyd olunur. Yerli mediada davamlı çıxışlar olur, Qarabağ və Xocalı günləri keçirilir, verilişlər təşkil olunur”.

Ə. Şeydabəyov Azərbaycanlı tələbələrin dərnəyinin yerli türk tələbələrlə sıx əlaqə qurduğunu da qeyd edib. Onun sözlərinə görə, aparılan işlər nəticəsində türk tələbələrin ölkə ilə bağlı təsəvvürləri genişləndirilir. O, bu fəaliyyətin nəticəsi olaraq son illər Şimali Kiprdən Azərbaycana təhsil almaq üçün gələn tələbələrin sayının artdığını qeyd edib.