Diaspor

Ana səhifə

Diaspor

Dünya Azərbaycanları Konqresinin həmsədri Kanada Qələm Təşkilatının sabiq sədri ilə görüşüb

10 oktyabr 2009 10:10 (UTC +04:00)

Bakı. Ülkər Qasımova - APA. Bu gün Azərbaycan Atatürk Mərkəzində Dünya Azərbaycanları Konqresinin (DAK) həmsədri, xalq şairi, millət vəkili Sabir Rüstəmxanlının dəvəti ilə Bakıya gələn dünya şöhrətli ziyalı, Kanada Qələm Təşkilatının keçmiş sədri Rza Bərahəni başda olmaqla ABŞ, Kanada, İngiltərə, Almaniya, İsveçdən olan 12 tanınmış soydaşımızın iştirakı ilə toplantı keçirilib. APA-nın məlumatına görə, tədbirdə çıxış edən DAK-ın həmsədri S.Rüstəmxanlı qonaqların ölkəmizə səfərinin məqsədini açıqlayıb: «Onların ölkəmizə səfərində məqsəd Azərbaycan dövlətinin güclənməsi və inkişafı ilə tanış olmaq, milli ədəbiyyatımızın durumu ilə yaxından maraqlanmaq və erməni işğalçılarının Azərbaycana qarşı təcavüzkar siyasətinin mahiyyətini yerində incələməkdir. Nümayəndə heyəti artıq oktyabrın 4-dən Bakıdadır və bütün bu məsələlərlə bağlı yetəri qədər məlumat toplayıblar».

S.Rüstəmxanlı qeyd edib ki, qonaqlar səfər çərçivəsində Fəxri Xiyabanda Heydər Əliyevin və akademik Zərifə Əliyevanın, 1945-1946-cı illərdə Güney Azərbaycan Milli Hökumətinin qurucusu Seyid Cəfər Pişəvərinin və Milli Azadlıq Hərəkatının lideri, Azərbaycanın eks-prezidenti Əbülfəz Elçibəyin məzarlarını, eləcə də Şəhidlər Xiyabanını ziyarət ediblər. Tədbirin davamında S.Rüstəmxanlı DAK, Azərbaycan Federal Demokrat Hərəkatı və xaricdə yaşayan bir qrup Güney Azərbaycan ziyalısının Bakı Bəyannaməsini oxuyub: «Bu bəyannamə Güney Azərbaycan ziyalısı Bakı görüşündə tarixi vətənlərində xaricdə yaşayan azərbaycanlıların problemlərini müzakirə edərək qərar alınıb. Bəyannamənin birinci bəndində tarixi ədalətsizlik nəticəsində parçalanmış Azərbaycan türklərinə qarşı İranda aparılan assimilyasiya siyasətini və Güney Azərbaycanda insan hüquqlarının pozulmasını dünyaya çatdırmaqla beynəlxalq təşkilatların diqqətini cəlb etmək göstərilib. İkinci bənd Ermənistanın Azərbaycana qarşı işğalçılıq müharibəsinin nəticələrinin aradan qaldırılması və Qarabağ probleminin beynəlxalq hüquq çərçivəsində həllinə yardım etmək, üçüncü bənddə isə Güney azərbaycanlıları və Azərbaycan arasında mədəni əlaqələrin inkişafının millətimizin xeyrinə olduğunu düşünərək, bu münasibətlərin daha da inkişafı və yaşadıqları ölkələrdə Azərbaycan mədəniyyətini təbliğ etmək yer alıb».

Toplantıda Almaniyadan Bakıya səfər etmiş həkim Sədiqə Ədalətli, «Azəri-Türk» Qadınlar Birliyinin sədri Tənzilə Rüstəmxanlı və başqaları mövcud problemlərlə bağlı çıxışlar ediblər.

Eyni zamanda ziyalılar Azərbaycanın mədəniyyəti, ədəbiyyatı, tarixi keçmişini əks etdirən Ədəbiyyat və Tarix muzeyləri ilə də yaxından tanış olublar. Qonaqlar Azərbaycan Yazıçılar Birliyinin sədri, xalq yazıçısı Anarla da görüşüblər. Bu görüşün sonunda isə AYB sədri Anar Kanada Qələm Təşkilatının keçmiş sədri Rza Bərahaniyə AYB-in fəxri üzvlük vəsiqəsini təqdim edib. Səfər çərçivəsində eləcə də qonaqların AMEA-nın vitse-prezidenti Arif Həşimovla, Diaspora ilə İş üzrə Dövlət Komitəsinin sədri Nazim İbrahimovla da görüşləri keçirilib.