Diaspor

Ana səhifə

Diaspor

Berlində almanların Azərbaycana köçünün 190 illiyi münasibətilə elmi konfrans keçirilib

19 oktyabr 2009 10:15 (UTC +04:00)

Bakı. Viktoriya Dementyeva – APA. Azərbaycanın Almaniyadakı səfirliyinin və bu ölkədəki “EuroKaukAsia” cəmiyyətinin birgə təşkilatçılığı ilə Baden-Vürtemberq federal torpağının Berlindəki nümayəndəliyində XIX əsrin I yarısında almanların Azərbaycana köç etməsinin 190 illiyi münasibətilə “Almanlar Qafqazın multietnik həyatında” adlı elmi konfrans keçirilib.

Azərbaycanın Almaniyadakı səfirliyinin mətbuat xidmətindən APA-ya verilən məlumata görə, konfransın əsas məqsədi alman koloniyalarının Qafqazda, əsasən Azərbaycanda yerləşməsi və sonrakı prosesləri işıqlandırmaq olub. Konfransda məruzəçi qismində Almaniya, Azərbaycan, Rusiya və Türkiyədən olan mütəxəssislər iştirak edib.

İki gün davam edən konfransda ilk günündə Baden-Vürtemberq federal torpağının AFR və Avropa məsələləri üzrə dövlət naziri Volfqang Raynhart və Azərbaycan Almaniyadakı səfiri Pərviz Şahbazov çıxış ediblər. “EuroKaukAsia” cəmiyyətinin sədri, professor Eva-Maria Aux isə məruzə ilə çıxış edərək, alman koloniyalarının Azərbaycanda yerləşdirilməsinin Çar Rusiyasının xristian əhalini Azərbaycanda yerləşdirmək siyasəti ilə bağlı olduğunu bildirib. O, məhz bu səbəbdən 1828-ci ildə Türkmənçay müqaviləsindən sonra on minlərlə erməni ailəsinin Qafqaza, xüsusən Azərbaycana yerləşdirildiyini vurğulayıb.

Azərbaycanın Almaniyadakı səfirliyi konfrans iştirakçılarının şərəfinə qəbul təşkil edib.