Diaspor

Ana səhifə

Diaspor

Minskdə “Qobustan” Cəmiyyətinin 20 illik yubileyi qeyd olunub

29 oktyabr 2009 20:27 (UTC +04:00)

Bakı – APA. Oktyabrın 27-də Minsk şəhərindəki “Millətlər və Mədəniyyətlər Sarayı”nda Belarusda fəaliyyət göstərən “Qobustan” Cəmiyyətinin 20 illik yubileyi qeyd olunub.

Diaporla İş üzrə Dövlət Komitəsinin (DİDK) mətbuat xidmətindən APA-ya verilən məlumata görə, tədbiri açan cəmiyyətin sədri Baxşı Qəmbərov qurumun 20 illik fəaliyyətindən, əldə etdiyi uğurlardan, digər xalqları təmsil edən icmalarla qarşılıqlı əlaqələrindən danışıb. O qeyd edib ki, cəmiyyətin təşəbbüsü və təşkilatçılığı ilə təkcə bu il ərzində reallaşdırılan iki böyük layihə-Belarusun Vileyka şəhərində iki dəfə Sovet İttifaqı Qəhrəmanı olmuş Həzi Aslanovun heykəlinin, Magilyov şəhərində isə Sovet İtifaqı Qəhrəmanı Aslan Vəzirovun büstünün qoyulması həm bütün səviyyələrdə yüksək dəyərləndirilir, həm də “Qobustan”ın bu ölkədə nüfuzunun və imkanlarının göstəricisi hesab oluna bilər. B.Qəmbərov cəmiyyətin gələcək planları barədə də məlumat verib.

Tədbirdə iştirak edən DİDK-nın şöbə müdiri Şakir Səlimov “Qobustan” Cəmiyyətinin 20 illik yubileyini təbrik edib və təmsil etdiyi komitənin bu qurumun gördüyü işləri yüksək qiymətləndirdiyini bildirib. DİDK təmsilçisi bütövlükdə Belarusdakı Azərbaycan diasporunun fəallığının getdikcə artdığını və Azərbaycan dövlətinin hər zaman onların arxasında olduğunu vurğulayıb.

Belarus Nazirlər Kabinetinin milli məsələlər üzrə şöbəsinin müdiri Mixail Rıbakov bu ölkənin hökuməti adından “Qobustan”ın rəhbərliyini və üzvlərini təbrik edərək bildirib ki, bu təşkilatın gördüyü işlər ölkə rəhbərliyinin də diqqətindən yayınmır və hər zaman yüksək qiymətləndirilir.

Belarusdakı Azərbaycan İcmaları Konqresinin sədri Natiq Bağırov da öz çıxışında “Qobustan” Cəmiyyətini təbrik edib, qurumun 20 il ərzində bu ölkədəki soydaşlarımızın təşkilatlanmasındakı rolundan danışıb.

Azərbaycanın Belarusdakı səfirliyinin müşaviri Asya Manafova da cəmiyyətə təbriklərini çatdırıb. Belarusdakı digər xalqların diaspor təşkilatlarının rəhbərləri “Qobustan”ın sədrinə yubiley hədiyyələri təqdim ediblər.

Sonda Azərbaycan və Belarus incəsənət xadimlərinin iştirakı ilə konsert təşkil olunub.